ਪਟਿਆਲਾ (ਅਰਵਿੰਦਰ ਸਿੰਘ) ਨੈਸ਼ਨਲ ਥੀਏਟਰ ਆਰਟਸ ਸੁਸਾਇਟੀ (ਨਟਾਸ) ਪਟਿਆਲਾ ਵੱਲੋਂ ਅਰੰਭੀ ਮਾਤ ਭਾਸ਼ਾ ਰੰਗ ਮੰਚ ਵਿਕਾਸ ਮੁਹਿੰਮ ਤਹਿਤ ਦੰਪਤੀ ਸ਼੍ਰੀ ਪ੍ਰਾਣ ਸਭਰਵਾਲ-ਸ਼੍ਰੀਮਤੀ ਸੁਨੀਤਾਸਭਰਵਾਲਦੇ ਨਿਰਦੇਸ਼ਨ ਹੇਠ ਫਰਵਰੀ ਦੇ 29 ਦਿਨਾਂ ਵਿੱਚ 12 ਚੇਤਨਾ ਨਾਟਕ ਮੇਲੇ ਵੱਖ-ਵੱਖ ਸਥਾਨਾਂ ਤੇ ਆਯੋਜਿਤ ਕੀਤੇ ਗਏ ਹਨ। ਉਪਰੋਕਤ ਵਿਚਾਰ ਨਟਾਸ ਦੇ ਪ੍ਰਧਾਨ ਸ੍ਰ. ਗੁਰਬਚਨ ਸਿੰਘ ਕੱਕੜ ਨੇ ਬਾਰਾਂਦਰੀ ਬਾਗ਼ ਵਿਖੇ ਅਆਯੋਜਿਤ ਮੁਹਿੰਮ ਦੇ ਸਮਾਪਨ ਤੇ ਕੀਤੇ। ਇਸ ਅਵਸਰ ਤੇ ਨਟਾਸ ਦੀਆਂ ਰੰਗ ਮੰਚ ਗਤੀਵਿਧੀਆਂ ਦੀ ਸਹਿਯੋਗੀ ਸ਼ਖ਼ਸੀਅਤਾਂ ਡਾ. ਸਵਰਨ ਸਿੰਘ ਮਾਨ ਡਿਪਟੀ ਡਾਇਰੈਕਟਰ ਬਾਗ਼ਬਾਨੀ ਵਿਭਾਗ ਜੋ ਸਕੱਤਰ ਬਾਰਾਂਦਰੀ ਗਾਰਡਨ ਮੇਨਟੇਨੈਂਸ ਕਮੇਟੀ ਵੀ ਹਨ ਅਤੇ ਵਿਭਾਗ ਦੇ ਸਹਾਇਕ ਡਾਇਰੈਕਟਰ ਡਾ. ਨਿਰਵੰਤ ਸਿੰਘ ਨੂੰ ਸਨਮਾਨਿਤ ਕੀਤਾ ਗਿਆ।
ਇਹਨਾਂ ਸ਼ਖ਼ਸੀਅਤਾਂ ਨੂੰ ਨਟਾਸ ਚੇਅਰਮੈਨ ਪ੍ਰਸਿੱਧ ਸਮਾਜਿਕ ਸ਼ਖ਼ਸੀਅਤ ਸ਼ਯਾਮਲਾਲ ਨਵਯੁਗ ਐਮ.ਡੀ ਹੋਟਲ ਫਲਾਈਓਵਰ ਕਲਾਸਿਕ, ਨਟਾਸ ਨਿਰਦੇਸ਼ਕ ਸ਼੍ਰੀ ਪ੍ਰਾਣ ਸਭਰਵਾਲ ਨੇ ਐਵਰਾਡ ਆਫ਼ ਆਨਰ, ਗੁਲਦਸਤੇ ਅਤੇ ਸਾਹਿਤਿਕ ਉਪਹਾਰ ਵਜੋਂ ਲੇਖਕ-ਕਲਾਕਾਰ ਮਹਿੰਦਰ ਸਿੰਘ ਜੱਗੀ ਦੀਆਂ ਨਵ ਪ੍ਰਸ਼ਾਸਕ ਪੁਸਤਕਾਂ ਭੇਂਟ ਕਰ ਕੇ ਸਨਮਾਨਿਤ ਕੀਤਾ। ਪ੍ਰਧਾਨ ਸ੍ਰ. ਕੱਕੜ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇਹ ਸਨਮਾਨ ਉਨ੍ਹਾਂ ਵੱਲੋਂ ਬਾਰਾਂਦਰੀ ਬਾਗ਼ ਅਤੇ ਨਰਸਰੀ ਦੇ ਕੁਸ਼ਲ ਪ੍ਰਬੰਧ, ਉੱਨਤੀ, ਸੈਰ ਪ੍ਰੇਮੀਆਂ ਨੂੰ ਉਪਲਬਧ ਸਹੂਲਤਾਂ ਅਤੇ ਪਿਛਲੇ 18 ਸਾਲਾਂ ਤੋਂ ਚਲਾਈ ਜਾ ਰਹੀ ਸਫਲ ਗਾਰਡਨ ਥੀਏਟਰ ਮੁਹਿੰਮ ਤਹਿਤ ਹੁਣ ਤੱਕ ਪੇਸ਼ 227 ਮਾਸਿਕ ਗਾਰਡਨ ਨਾਟਕ ਮੇਲਿਆਂ ਦੇ ਸਫਲ ਆਯੋਜਨ ਵਿੱਚ ਪਾਏ ਵਡਮੁੱਲੇ ਯੋਗਦਾਨ ਲਈ ਪ੍ਰਦਾਨ ਕੀਤਾ ਗਿਆ ਹੈ।
ਨਟਾਸ ਨਿਰਦੇਸ਼ਕ ਸ਼੍ਰੀ ਪ੍ਰਾਣ ਸਭਰਵਾਲ ਨੇ ਉਪਰੋਕਤ ਸ਼ਖ਼ਸੀਅਤਾਂ ਵਿਸ਼ੇਸ਼ ਤੌਰ ਤੇ ਸੁਹਿਰਦ, ਕੁਸ਼ਲ ਪ੍ਰਸ਼ਾਸਕ ਸ਼੍ਰੀ ਕੁਮਾਰ ਅਮਿੱਤ ਆਈ.ਏ.ਐਸ ਡਿਪਟੀ ਕਮਿਸ਼ਨਰ ਪਟਿਆਲਾ ਜੋ ਬਾਰਾਂਦਰੀ ਬਾਗ਼ ਮੇਨਟੇਨੈਂਸ ਕਮੇਟੀ ਦੇ ਚੇਅਰਮੈਨ ਹਨ, ਦਾ ਧੰਨਵਾਦ ਕਰਦਿਆਂ ਨਟਾਸ ਦੀਆਂ ਤੇਜ਼ੀ ਨਾਲ ਚੱਲ ਰਹੀਆਂ ਸਰਗਰਮੀਆਂ ਬਾਰੇ ਰੌਸ਼ਨੀ ਪਾਈ। ਉਨ੍ਹਾਂ ਨੇ ਦੱਸਿਆ ਕਿ ਬੀਤੀ ਫਰਵਰੀ ਦੇ 29 ਦਿਨਾਂ ਵਿੱਚ ਨਟਾਸ ਵੱਲੋਂ 12 ਚੇਤਨ ਨਾਟਕ ਮੇਲੇ ਵੱਖ-ਵੱਖ ਸਥਾਨਾਂ ਜਿਵੇਂ ਬਾਰਾਂਦਰੀ ਬਾਗ਼ ਥੀਏਟਰ ਕੰਪਲੈਕਸ, ਢੁਡਿਆਲ ਖ਼ਾਲਸਾ ਸਕੂਲ, ਸਰਕਾਰੀ ਹਾਈ ਸਕੂਲ, ਸਰਕਾਰੀ ਐਲੀਮੈਂਟਰੀ ਸਕੂਲ ਥੇੜ੍ਹੀ, ਵੀਰ ਹਕੀਕਤ ਰਾਏ ਸਕੂਲ, ਰਾਜ ਪੱਧਰੀ ਅੰਤਰਰਾਸ਼ਟਰੀ ਮਾਤ ਭਾਸ਼ਾ ਦਿਵਸ ਜਸ਼ਨ ਭਾਸ਼ਾ ਭਵਨ ਪਟਿਆਲਾ, ਕਰਾਫ਼ਟ ਮੇਲਾ ਸ਼ੀਸ਼ ਮਹਿਲ ਤੋਂ ਬਿਨਾ ਜ਼ਿਲ੍ਹਾ ਫ਼ਤਿਹਗੜ੍ਹ ਸਾਹਿਬ ਦੇ ਪਿੰਡਾਂ ਪੰਜ ਕੋਹਾਂ, ਸਾਲਾਨਾ ਜੀਵਨ ਸਿੰਘ ਵਾਲਾ, ਉੱਚਾ ਜਟਾਣਾ, ਰਾਏਪੁਰ ਰਾਈਆਂ, ਮੂਲੇ ਪੁਰ ਅਤੇ ਕੋਟਲਾ ਆਦਿ ਵਿੱਚ ਚੇਤਨਾ ਨਾਟਕ ਮੇਲੇ ਆਯੋਜਿਤ ਕੀਤੇ ਗਏ ਜਿਨ੍ਹਾਂ ਵਿੱਚ ਸਮਾਜ ਸੁਧਾਰਕ ਨਾਟਕ, 550ਵੇਂ ਗੁਰਪੁਰਬ ਨੂੰ ਸਮਰਪਿਤ ਨਾਟਕ ਕਿਰਤ ਦਾ ਸਤਿਕਾਰ, ਅਜਮੇਰ ਔਲਖ ਦੇ ਨਾਰੀ-ਸ਼ਕਤੀਕਰਨ, ਨਸ਼ਿਆਂ ਵਿਰੁੱਧ ਅਵੇਸਲੇ ਯੁੱਧਾਂ ਦੀ ਨਾਇਕਾ, ਘਰੇਲੂ ਹਿੰਸਾ ਵਿਰੁੱਧ ਸੁੱਕੀ ਕੁੱਖ, ਇੱਕ ਵਿਚਾਰੀ ਮਾਂ ਅਤੇ ਫ਼ਤਿਹਗੜ੍ਹ ਸਾਹਿਬ ਸੈਂਟਰਲ ਕੋਆਪ੍ਰੇਟਿਵ ਬੈਂਕ ਵੱਲੋਂ ਦਿੱਤੀਆਂ ਜਾ ਰਹੀਆਂ ਸਹੂਲਤਾਂ ਬਾਰੇ ਨਾਟਕ ਆਈ ਖ਼ੁਸ਼ਹਾਲੀ ਆਦਿ ਸਫਲਤਾ ਪੂਰਵਕ ਪੇਸ਼ ਕੀਤੇ ਗਏ। ਨਾਟਕਾਂ ਵਿੱਚ ਵਧੀਆਂ ਅਦਾਕਾਰੀ ਲਈ ਵਾਹ-ਵਾਹ ਖੱਟਣ ਵਾਲੇ ਕਲਾਕਾਰਾਂ ਜਿਨ੍ਹਾਂ ਨੂੰ ਕੈਸ਼ ਅਵਾਰਡ ਪ੍ਰਦਾਨ ਕਰ ਕੇ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ ਦੇ ਨਾਮ ਇਸ ਪ੍ਰਕਾਰ ਹਨ ਸ੍ਰ. ਐਮ.ਐਸ ਜੱਗੀ, ਕਮਲਦੀਪ ਸਿੰਘ ਗਿੱਲ (ਟਿੰਮੀ), ਸਵੀਟੀ ਰਾਜਪੂਤ, ਰਾਜ ਸ਼੍ਰੀ, ਅਰਸ਼ਦੀਪ ਕੌਰ, ਮਨੀਸ਼ਾ, ਰਜਤ ਚੌਹਾਨ, ਗੁਰ ਪਰਗਟ ਸਿੰਘ, ਪਰਮਵੀਰ ਸਿੰਘ, ਯੁਵਰਾਜ, ਤਕਨੀਕੀ ਟੀਮ ਅਕਸ਼ਤ ਕੁਮਾਰ ਗਰੁੱਪ। ਅੰਤ ਵਿੱਚ ਮੁੱਖ ਮਹਿਮਾਨ ਡਾ. ਸਵਰਨ ਸਿੰਘ ਮਾਨ ਨੇ ਦਰਸਾਏ ਆਦਰ-ਸਨੇਹ ਦਾ ਧੰਨਵਾਦ ਕਰਦਿਆਂ ਭਰੋਸਾ ਦਵਾਇਆ ਕਿ ਡਿਪਟੀ ਕਮਿਸ਼ਨਰ ਜੀ ਦੀ ਸਰਪ੍ਰਸਤੀ ਹੇਠ ਉਪਲਬਧ ਹੋਰ ਸਹੂਲਤਾਂ ਗਾਰਡਨ ਥੀਏਟਰ ਲਹਿਰ ਦੀ ਮਜ਼ਬੂਤੀ ਲਈ ਨਟਾਸ ਨੂੰ ਮੁਹੱਈਆ ਕੀਤੀਆਂ ਜਾਣਗੀਆਂ।
