ਸ੍ਰੀ ਅਨੰਦਪੁਰ ਸਾਹਿਬ, ਮੀਡੀਆ ਬਿਊਰੋ:
ਅੱਜ ਐਤਵਾਰ ਨੂੰ ਗੁਰੂ ਨਗਰੀ ਸ੍ਰੀ ਅਨੰਦਪੁਰ ਸਾਹਿਬ ਵਿਖੇ ਸੁਪਰ ਸਿੱਖਸ ਮੈਰਾਥਨ (Super Sikhs Marathon) ਹੋਈ ਜਿਸ ਵਿਚ ਜੰਮੂ ਕਸ਼ਮੀਰ ਦੇ ਇਕ ਰਨਰ ਦੀ ਮੌਤ ਹੋ ਗਈ। ਮੈਰਾਥਨ ‘ਚ ਇਕ ਹਜ਼ਾਰ ਦੇ ਕਰੀਬ ਰਨਰਜ਼ ਨੇ ਹਿੱਸਾ ਲਿਆ। ਜੰਮੂ ਕਸ਼ਮੀਰ ਤੋਂ ਆਏ ਰਨਰ ਜਿਨ੍ਹਾਂ ਦੀ ਉਮਰ 40 ਤੋਂ 50 ਸਾਲ ਦਰਮਿਆਨ ਦੱਸੀ ਜਾ ਰਹੀ ਹੈ, ਨੇ 21 ਕਿਲੋਮੀਟਰ ਦੌੜ ‘ਚ ਸ਼ਮੂਲੀਅਤ ਕੀਤੀ ਸੀ। ਉਹ ਦੌੜ ਲਗਾ ਕੇ ਠੀਕ-ਠਾਕ ਵਾਪਸ ਵਿਰਾਸਤ ਏ ਖਾਲਸਾ ਪਹੁੰਚ ਗਏ ਸੀ। ਦੌੜ ਪੂਰੀ ਹੋਣ ਉਪਰੰਤ ਬਾਹਰ ਗਏ ਤੇ ਤਕਰੀਬਨ ਇਕ ਘੰਟੇ ਬਾਅਦ ਜਦੋਂ ਵਾਪਸ ਆਏ। ਆਉਂਦੇ ਸਾਰ ਹੀ ਵਿਰਾਸਤ ਏ ਖਾਲਸਾ ਦੇ ਗੇਟ ਨੇੜੇ ਚੱਕਰ ਆਉਣ ‘ਤੇ ਡਿੱਗ ਗਏ ਉਨ੍ਹਾਂ ਦੇ ਨਾਲ ਦੇ ਸਾਥੀ ਉਨ੍ਹਾਂ ਨੂੰ ਤੁਰੰਤ ਸਰਕਾਰੀ ਹਸਪਤਾਲ ਵਿਖੇ ਲੈ ਗਏ ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਕਰਾਰ ਦਿਤਾ।
ਇਸ ਬਾਰੇ ਗੱਲ ਕਰਨ ‘ਤੇ ਮੈਰਾਥਨ ਆਗੂ ਡਾ. ਜਸਸਿਮਰਨ ਸਿੰਘ ਕਹਿਲ ਨੇ ਦੱਸਿਆ ਕਿ ਰਨਰ ਨੇ 21 ਕਿਲੋਮੀਟਰ ਦੌੜ 1 ਘੰਟਾ 50 ਮਿੰਟ ‘ਚ ਪੂਰੀ ਕੀਤੀ ਜੋ ਕਿ 07.50 ਵਜੇ ਪੂਰੀ ਕੀਤੀ ਗਈ। ਇਸ ਉਪਰੰਤ ਉਹ ਘੁੰਮਦੇ ਰਹੇ, ਫੋਟੋਆਂ ਖਿਚਦੇ ਰਹੇ, ਖਾਂਦੇ ਪੀਂਦੇ ਰਹੇ ਤੇ ਬਾਹਰ ਚਲੇ ਗਏ। ਜਦੋਂ ਦੁਬਾਰਾ ਵਾਪਸ ਆਏ ਤਾਂ ਉਨ੍ਹਾਂ ਦੇ ਨਾਲ ਦੋ ਸਾਥੀ ਹੋਰ ਵੀ ਸਨ ਤੇ ਵਿਰਾਸਤ ਏ ਖਾਲਸਾ ਦੇ ਗੇਟ ‘ਤੇ 8.40 ‘ਤੇ ਡਿੱਗ ਪਏ। ਉਨ੍ਹਾਂ ਦੇ ਸਾਥੀ ਉਸੇ ਵੇਲੇ ਗੱਡੀ ‘ਚ ਪਾ ਕੇ ਹਸਪਤਾਲ ਲੈ ਗਏ ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਕਰਾਰ ਦੇ ਦਿਤਾ। ਡਾ. ਕਹਿਲ ਨੇ ਦੱਸਿਆ ਕਿ ਇਹ ਮੰਦਭਾਗੀ ਘਟਨਾ ਰਨ ਪੂਰੀ ਹੋਣ ਤੋਂ ਇਕ ਘੰਟੇ ਬਾਅਦ ਵਾਪਰੀ ਜੋ ਦੁਖਦਾਈ ਹੈ। ਇਸ ਸਬੰਧੀ ਥਾਣਾ ਮੁਖੀ ਗੁਰਪ੍ਰੀਤ ਸਿੰਘ ਨਾਲ ਗੱਲ ਕਰਨ ਤੇ ਉਨ੍ਹਾਂ ਦੱਸਿਆ ਕਿ ਮ੍ਰਿਤਕ ਪ੍ਰਣਬ ਮਹਾਜਨ ਪੁੱਤਰ ਸਵਰਗੀ ਕਾਲਾ ਰਾਮ, ਆਰ ਐਸ ਪੁਰਾ ਜੰਮੂ ਕਸ਼ਮੀਰ ਦਾ ਰਹਿਣ ਵਾਲਾ ਸੀ ਪੁਲਿਸ ਵਲੋਂ ਬਣਦੀ ਕਾਰਵਾਈ ਕੀਤੀ ਜਾ ਰਹੀ ਹੈ।
