ਗਲਾਸਗੋ/ ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)ਲੰਡਨ ਵਿੱਚ ਪਿਛਲੇ ਸਾਲ ਇੱਕ ਟ੍ਰੈਫਿਕ ਸਟਾਪ ਦੌਰਾਨ ਰੋਕਣ ਤੋਂ ਬਾਅਦ ਇੱਕ ਨਸ਼ਾ ਤਸਕਰ ਕੋਲੋਂ ਵੱਡੀ ਮਾਤਰਾ ਵਿੱਚ ਹੈਰੋਇਨ, ਇੱਕ ਸਬ-ਮਸ਼ੀਨ ਗੰਨ ਅਤੇ 220,000 ਪੌਂਡ ਤੋਂ ਵੱਧ ਦੀ ਨਕਦ ਰਾਸ਼ੀ ਬਰਾਮਦ ਕੀਤੀ ਗਈ ਸੀ। ਇਸ ਤਸਕਰੀ ਦੇ ਦੋਸ਼ੀ 29 ਸਾਲਾਂ ਵਿਅਕਤੀ ਅਜ਼ੀਮ ਅਖਤਰ ਨੂੰ ਸ਼ੁੱਕਰਵਾਰ ਨੂੰ ਅੱਠ ਸਾਲ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਪਿਛਲੇ ਸਾਲ ਨਵੰਬਰ ਵਿੱਚ ਮੈਟਰੋਪੋਲੀਟਨ ਪੁਲਿਸ ਬ੍ਰੈਂਟ ਦੇ ਚੈਪਟਰ ਰੋਡ ‘ਤੇ ਗਸ਼ਤ ਕਰ ਰਹੀ ਸੀ ਜਿਸ ਦੌਰਾਨ ਅਧਿਕਾਰੀਆਂ ਵੱਲੋਂ ਅਖਤਰ ਦੀ ਗੱਡੀ ਨੂੰ ਰੋਕਿਆ ਗਿਆ। ਗੱਡੀ ਦੀ ਤਲਾਸ਼ੀ ਦੌਰਾਨ ਹੈਰੋਇਨ ਦੀ ਬਰਾਮਦੀ ਕੀਤੀ ਗਈ ਅਤੇ ਤਲਾਸ਼ੀ ਜਾਰੀ ਕਰਦਿਆਂ ਉਸਦੇ ਨੇੜਲੇ ਘਰ ਵਿੱਚੋਂ ਇੱਕ ਸਕਾਰਪੀਅਨ ਸਬ-ਮਸ਼ੀਨ ਗੰਨ ਅਤੇ 94 ਗੋਲੀਆਂ ਵੀ ਮਿਲੀਆਂ।
ਇਸਦੇ ਇਲਾਵਾ ਪੁਲਿਸ ਨੂੰ ਕੋਕੀਨ, ਭੰਗ ਦੇ ਨਾਲ ਜੁੱਤੀਆਂ ਦੇ ਬਕਸਿਆਂ ਅੰਦਰ ਲੁਕਾਏ ਹੋਏ 221,320 ਪੌਂਡ ਵੀ ਮਿਲੇ ਸਨ। ਅਖਤਰ ਨੂੰ ਹੋਰ ਦੋਸ਼ਾਂ ਦੇ ਨਾਲ-ਨਾਲ ਹਥਿਆਰ, ਗੋਲਾ ਬਾਰੂਦ ਅਤੇ ਨਸ਼ਾ ਸਪਲਾਈ ਕਰਨ ਲਈ ਦੋਸ਼ੀ ਮੰਨਦਿਆਂ ਹੈਰੋ ਕਰਾਉਨ ਕੋਰਟ ਵਿਚ ਦੋਸ਼ੀ ਠਹਿਰਾਇਆ ਗਿਆ ਸੀ। ਲੰਡਨ ਪੁਲਿਸ ਅਨੁਸਾਰ ਹਿੰਸਾ ਨੂੰ ਘਟਾਉਣਾ ਉਹਨਾਂ ਦੀ ਸਭ ਤੋਂ ਵੱਡੀ ਤਰਜੀਹ ਹੈ ਅਤੇ ਅਧਿਕਾਰੀ ਰੋਜ਼ਾਨਾ ਲੰਡਨ ਵਿੱਚ ਲੋਕਾਂ ਨੂੰ ਸੁਰੱਖਿਅਤ ਰੱਖਣ ਲਈ ਵਚਨਬੱਧ ਹਨ।
