ਗਲਾਸਗੋ/ ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)ਯੂਕੇ ਵਿੱਚ ਵੱਡੀ ਗਿਣਤੀ ‘ਚ ਜਾਨਲੇਵਾ ਏਸ਼ੀਅਨ ਭੂੰਡਾਂ ਦੀ ਆਮਦ ਨੋਟ ਕੀਤੀ ਗਈ ਹੈ, ਇਸ ਲਈ ਮਾਹਿਰਾਂ ਨੇ ਇਹਨਾਂ ਦੀ ਗਿਣਤੀ ਨੂੰ ਰਿਕਾਰਡ ਪੱਧਰ ‘ਤੇ ਪਹੁੰਚਣ ਬਾਰੇ ਚੇਤਾਵਨੀ ਵੀ ਦਿੱਤੀ ਹੈ। ਅੱਜ ਤੱਕ, ਯੂਕੇ ਦੇ ਜਰਸੀ ਵਿੱਚ 71 ਏਸ਼ੀਅਨ ਹਾਰਨੇਟ ਕਿਸਮ ਦੀਆਂ ਰਾਣੀਆਂ ਲੱਭੀਆਂ ਗਈਆਂ ਹਨ, ਜੋ ਕਿ 2019 ਵਿੱਚ 69 ਸਨ।
ਏਸ਼ੀਅਨ ਮੱਖੀਆਂ ਦੀ ਇਸ ਕਿਸਮ ਹੋਰਨੈਟ, ਜਿਸ ਨੂੰ ਪੀਲੇ-ਪੈਰ ਵਾਲੀਆਂ ਮੱਖੀਆਂ ਵੀ ਕਿਹਾ ਜਾਂਦਾ ਹੈ, ਦੇ ਸਿਰਫ ਇੱਕ ਡੰਗ ਨਾਲ ਐਲਰਜੀ ਵਾਲੇ ਲੋਕਾਂ ਦੀ ਮੌਤ ਹੋ ਸਕਦੀ ਹੈ। ਇਹਨਾਂ ਦਾ ਅਸਲੀ ਖਤਰਾ ਮਧੂ ਮੱਖੀਆਂ ਦੀ ਆਬਾਦੀ ਨੂੰ ਤਬਾਹ ਕਰਨ ਨਾਲ ਹੈ। ਇਹ ਏਸ਼ੀਅਨ ਭੂੰਡ ਸ਼ਹਿਦ ਦੀਆਂ ਮੱਖੀਆਂ ਨੂੰ ਆਪਣੀ ਖੁਰਾਕ ਬਣਾਉਂਦੇ ਹਨ। ਇਹ ਪ੍ਰਤੀ ਦਿਨ 50 ਮਧੂ ਮੱਖੀਆਂ ਨੂੰ ਖਾ ਸਕਦੇ ਹਨ।
ਇਹ ਏਸ਼ੀਅਨ ਭੂੰਡ ਯੂਰਪੀਅਨ ਹੋਰਨੈਟਜ਼ ਦੇ ਸਮਾਨ ਹੀ ਦਿਖਾਈ ਦਿੰਦੇ ਹਨ, ਪਰ ਇਹਨਾਂ ਦੀ ਪਛਾਣ ਗੂੜ੍ਹੇ ਭੂਰੇ ਅਤੇ ਕਾਲੇ ਸਰੀਰ ਦੇ ਨਾਲ ਪੀਲੀਆਂ ਲੱਤਾਂ ਅਤੇ ਹੇਠਲੇ ਸਿਰੇ ‘ਤੇ ਇੱਕ ਗੂੜ੍ਹੀ ਪੀਲੀ ਪੱਟੀ ਨਾਲ ਕੀਤੀ ਜਾ ਸਕਦੀ ਹੈ। ਇਹਨਾਂ ਦੇ ਸਮੂਹ ਵਿੱਚ ਰਾਣੀ ਮੱਖੀਆਂ ਦੀ ਲੰਬਾਈ 3 ਸੈਂਟੀਮੀਟਰ ਤੱਕ ਹੁੰਦੀ ਹੈ, ਜਦਕਿ ਕਾਮਿਆਂ ਦੀ ਲੰਬਾਈ 2.5 ਸੈਮੀਮੀਟਰ ਤੱਕ ਹੁੰਦੀ ਹੈ। ਇਹਨਾਂ ਮੱਖੀਆਂ ਤੋਂ ਸੁਰੱਖਿਆ ਦੇ ਮੱਦੇਨਜ਼ਰ ਜਰਸੀ ਦੇ ਲੋਕਾਂ ਨੂੰ ਆਪਣੇ ਸ਼ੈੱਡਾਂ, ਗੈਰਜਾਂ ਅਤੇ ਬਾਹਰੀ ਥਾਂਵਾਂ ਦੀ ਨਿਗਰਾਨੀ ਕਰਨ ਲਈ ਕਿਹਾ ਗਿਆ ਹੈ।
