ਗਲਾਸਗੋ/ ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)ਯੂਕੇ ਵਿੱਚ ਮੋਟਰਵੇਅ 25 ‘ਤੇ ਪੁਲਿਸ ਵੱਲੋਂ ਇੱਕ ਟਰੱਕ ਨੂੰ ਰੋਕ ਕੇ ਗੈਰਕਾਨੂੰਨੀ ਪ੍ਰਵਾਸੀ ਮੰਨੇ ਜਾਂਦੇ 12 ਵਿਅਕਤੀਆਂ ਨੂੰ ਬਰਾਮਦ ਕੀਤਾ ਹੈ। ਇਹ ਸਾਰੇ ਪ੍ਰਵਾਸੀ ਟਰੱਕ ਦੇ ਪਿਛਲੇ ਪਾਸੇ ਬੰਦ ਸਨ ਅਤੇ ਸਾਹ ਲੈਣ ਲਈ ਜੱਦੋਜਹਿਦ ਕਰ ਰਹੇ ਸਨ। ਪੁਲਿਸ ਨੂੰ ਸਵੇਰੇ 11 ਵਜੇ ਦੇ ਕਰੀਬ ਇਸ ਵਾਹਨ ਬਾਰੇ ਸੂਚਨਾ ਮਿਲੀ ਜਿਸ ਵਿੱਚ ਪ੍ਰਵਾਸੀ ਸਾਹ ਦੀ ਸਮੱਸਿਆ ਨਾਲ ਜੂਝ ਰਹੇ ਸਨ। ਇਸ ਲਈ ਤੁਰੰਤ ਕਾਰਵਾਈ ਕਰਵਾਈ ਕਰਦਿਆਂ ਅਧਿਕਾਰੀਆਂ ਨੇ ਸੇਰਟੀ ਦੇ ਨੇੜੇ ਸੜਕ ‘ਤੇ ਕਈ ਵਾਹਨਾਂ ਨੂੰ ਰੋਕਿਆ।
ਇਸ ਟਰੱਕ ਬਾਰੇ ਪੁਲਿਸ ਕੋਲ ਘੱਟ ਜਾਣਕਾਰੀ ਸੀ ,ਜਿਸ ਲਈ ਜਿਆਦਾ ਵਾਹਨਾਂ ਨੂੰ ਰੋਕਣ ਦੀ ਜਰੂਰਤ ਹੋਈ। ਇਸ ਟਰੱਕ ਨੂੰ ਜੇ -10 ਅਤੇ 11 ਦੇ ਦਰਮਿਆਨ ਐਂਟੀ-ਕਲਾਕਵਾਇਜ਼ ਕੈਰੇਜਵੇਅ ‘ਤੇ ਸਵੇਰੇ 11.30 ਵਜੇ ਰੋਕਿਆ ਗਿਆ ਅਤੇ ਇਸਦੇ ਪਿਛਲੇ ਹਿੱਸੇ ਵਿੱਚੋਂ ਗਿਆਰਾਂ ਆਦਮੀ ਅਤੇ ਇੱਕ ਔਰਤ ਬਰਾਮਦ ਹੋਏ। ਇਹਨਾਂ ਪ੍ਰਵਾਸੀਆਂ ਨੂੰ ਸੜਕ ਦੇ ਕਿਨਾਰੇ ਪੈਰਾਮੇਡਿਕਸ ਦੁਆਰਾ ਚੈੱਕ ਕੀਤਾ ਗਿਆ ਹੈ ਅਤੇ ਉਨ੍ਹਾਂ ਨੂੰ ਪੁਲਿਸ ਦੁਆਰਾ ਹਿਰਾਸਤ ਵਿੱਚ ਲੈ ਲਿਆ ਗਿਆ ਸੀ। ਇਮੀਗ੍ਰੇਸ਼ਨ ਸੇਵਾਵਾਂ ਇਸ ਮਾਮਲੇ ਵਿੱਚ ਅਗਲੇਰੀ ਜਾਂਚ ਕਰਨਗੀਆਂ।
