ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)– ਸਕਾਟਲੈਂਡ ਦੀਆਂ ਸੰਸਥਾਵਾਂ ਲਈ ਛਤਰੀ ਬਣ ਕੇ ਕੰਮ ਕਰ ਰਹੀ ਸੰਸਥਾ ਐਸੋਸੀਏਸ਼ਨ ਆਫ਼ ਇੰਡੀਅਨ ਸੰਸਥਾ (ਏ.ਆਈ.ਓ) ਵੱਲੋਂ ਬੀਤੇ ਦਿਨ ਬੰਬੇ ਬਲੂਅਜ਼ ਵਿਖੇ ਕੌਂਸਲ ਜਨਰਲ ਇੰਡੀਆ ਐਡਿਨਬਰਾ ਬਿਜੇ ਸੇਲਵਰਾਜ ਅਤੇ ਐੱਚ ਓ ਸੀ ਸੱਤਿਆ ਵੀਰ ਸਿੰਘ ਦੀ ਆਮਦ ‘ਤੇ ਵਿਸ਼ੇਸ਼ ਸੁਆਗਤੀ ਸਮਾਰੋਹ ਕਰਵਾਇਆ ਗਿਆ। ਦੋਵੇਂ ਸਖਸ਼ੀਅਤਾਂ ਨੂੰ ਪ੍ਰਬੰਧਕਾਂ ਵੱਲੋਂ ਗੁਲਦਸਤੇ ਭੇਂਟ ਕਰਕੇ ਜੀ ਆਇਆਂ ਕਹਿਣ ਉਪਰੰਤ ਏ.ਆਈ.ਓ. ਦੇ ਪ੍ਰਧਾਨ ਅੰਮ੍ਰਿਤਪਾਲ ਕੌਸ਼ਲ (ਐੱਮ ਬੀ ਈ) ਵੱਲੋਂ ਸਮਾਗਮ ਦੀ ਸ਼ੁਰੂਆਤ ਕਰਦਿਆਂ ਹਾਜਰੀਨ ਦੀ ਜਾਣ ਪਹਿਚਾਣ ਕਰਵਾਈ ਗਈ। ਡਾ. ਮਰਿਦੁਲਾ ਚਕਰਬੋਰਤੀ ਵੱਲੋਂ ਸਕਾਟਲੈਂਡ ਵਿੱਚ ਵੱਖ ਵੱਖ ਸੰਸਥਾਵਾਂ, ਗੁਰਦੁਆਰਾ ਸਾਹਿਬਾਨਾਂ ਦੀਆਂ ਕਮੇਟੀਆਂ, ਮੰਦਰ ਕਮੇਟੀ ਵੱਲੋਂ ਕੋਵਿਡ ਦੇ ਦੌਰ ਵਿੱਚ ਕੀਤੇ ਸ਼ਲਾਘਾਯੋਗ ਕਾਰਜਾਂ ਦਾ ਵਿਖਿਆਨ ਕਰਦਿਆਂ ਭਾਈਚਾਰੇ ਦੀ ਇੱਕਜੁਟਤਾ ਦਰਸਾਈ। ਇਸ ਉਪਰੰਤ ਕੌਂਸਲ ਜਨਰਲ ਇੰਡੀਆ ਐਡਿਨਬਰਾ ਬਿਜੇ ਸੇਲਵਰਾਜ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਬੇਸ਼ੱਕ ਸਕਾਟਲੈਂਡ ਵਸਦਾ ਭਾਰਤੀ ਭਾਈਚਾਰਾ ਕੋਈ ਵੀ ਪਾਸਪੋਰਟ ਧਾਰਕ ਹੋਵੇ ਪਰ ਉਹਨਾਂ ਦੀ ਆਪਣੀ ਜਨਮਭੂਮੀ ਪ੍ਰਤੀ ਤੜਫ਼, ਪ੍ਰਤੀਬੱਧਤਾ, ਇਮਾਨਦਾਰੀ ਕੀਤੇ ਜਾ ਰਹੇ ਕਾਰਜਾਂ ਵਿੱਚੋਂ ਬਾਖੂਬੀ ਝਲਕਦੀ ਹੈ।
ਲੋਕਾਂ ਦੇ ਦੁੱਖ ਸੁੱਖ ਸੁਣਨ ਲਈ ਗਲਾਸਗੋ ‘ਚ ਮੁੜ ਖੋਲ੍ਹੀ ਜਾਵੇ ਸਰਜਰੀ- ਸੋਹਣ ਸਿੰਘ ਰੰਧਾਵਾ
ਐੱਚ.ਓ.ਸੀ ਸੱਤਿਆ ਵੀਰ ਸਿੰਘ ਨੇ ਕਿਹਾ ਕਿ ਭਾਈਚਾਰੇ ਦੇ ਲੋਕਾਂ ਨੂੰ ਆਪਣੇ ਕੰਮਕਾਜ ਲਈ ਕਿਸੇ ਵੀ ਝਿਜਕ ਦੀ ਲੋੜ ਨਹੀਂ ਹੈ, ਅਸੀਂ ਅਫ਼ਸਰ ਨਹੀਂ ਬਲਕਿ ਲੋਕ ਸੇਵਕ ਬਣ ਕੇ ਆਏ ਹਾਂ। ਬਹੁਤ ਹੀ ਸੰਜੀਦਗੀ ਨਾਲ ਚੱਲੇ ਇਸ ਸਮਾਗਮ ਦੌਰਾਨ ਭਾਰਤੀ ਭਾਈਚਾਰੇ ਦੇ ਲੋਕਾਂ ਦਾ ਦਰਦ ਬਿਆਨ ਕਰਦਿਆਂ ਵਾਈਸ ਪ੍ਰੈਜ਼ੀਡੈਂਟ ਉੱਘੇ ਕਾਰੋਬਾਰੀ ਸੋਹਣ ਸਿੰਘ ਰੰਧਾਵਾ ਨੇ ਕਿਹਾ ਕਿ ਬੇਸ਼ੱਕ ਕਾਫੀ ਸਮਾਂ ਪਹਿਲਾਂ ਕੌਂਸਲ ਜਨਰਲ ਦਫ਼ਤਰ ਵੱਲੋਂ ਗਲਾਸਗੋ ਵਿਚ ਸਰਜਰੀ ਲਗਾ ਕੇ ਲੋਕਾਂ ਦੀਆਂ ਸਮੱਸਿਆਵਾਂ ਸੁਣੀਆਂ ਜਾਂਦੀਆਂ ਸਨ ਪਰ ਫਿਰ ਉਹ ਬੰਦ ਕਰ ਦਿੱਤੀ ਗਈ। ਰੰਧਾਵਾ ਨੇ ਕਿਹਾ ਕਿ ਸਕਾਟਲੈਂਡ ਵਿਚ ਗਲਾਸਗੋ ਸ਼ਹਿਰ ਭਾਰਤੀ ਭਾਈਚਾਰੇ ਦਾ ਧੁਰਾ ਹੈ। ਨਿੱਕੇ ਨਿੱਕੇ ਦਫ਼ਤਰੀ ਕੰਮਕਾਜ ਲਈ ਐਡਿਨਬਰਾ ਜਾਣ ਵੇਲੇ ਲੰਮੇ ਸਫ਼ਰ ਤੋਂ ਇਲਾਵਾ ਪੂਰਾ ਦਿਨ ਵੀ ਬਰਬਾਦ ਹੋ ਜਾਂਦਾ ਹੈ।
ਉਨ੍ਹਾਂ ਆਮ ਲੋਕਾਂ ਦੀ ਸਹੂਲਤ ਲਈ ਗਲਾਸਗੋ ਵਿਚ ਸਰਜਰੀ ਮੁੜ ਸਥਾਪਿਤ ਕਰਨ ਦੀ ਮੰਗ ਜ਼ੋਰ ਨਾਲ ਉਭਾਰੀ। ਜਿਸ ‘ਤੇ ਤੁਰੰਤ ਪ੍ਰਤੀਕਰਮ ਦਿੰਦਿਆਂ ਕੌਂਸਲ ਜਨਰਲ ਵੱਲੋਂ ਜਲਦ ਹੀ ਸਾਰਥਿਕ ਹੱਲ ਕੱਢਣ ਦੀ ਗੱਲ ਆਖੀ। ਮਹਿਮਾਨ ਤਕਰੀਰ ਵਜੋਂ ਮਨਦੀਪ ਖੁਰਮੀ ਹਿੰਮਤਪੁਰਾ ਨੇ ਭਾਵਪੂਰਤ ਸ਼ਬਦਾਂ ਵਿੱਚ ਭਾਈਚਾਰੇ ਨੂੰ ਨਿੱਜੀ ਗਰਜ਼ਾਂ ਤੋਂ ਉੱਪਰ ਉੱਠ ਕੇ ਕਾਰਜ ਕਰਨ ਦੀ ਬੇਨਤੀ ਕੀਤੀ।
ਇਸ ਸਮੇਂ ਸਵਿਤਾ ਪਦਮਾਭਨ ਤੇ ਸੰਤੋਖ ਸੋਹਲ ਨੇ ਆਪਣੀ ਪੁਖਤਾ ਸੰਗੀਤਕ ਪੇਸ਼ਕਾਰੀ ਰਾਹੀਂ ਸਮਾਂ ਬੰਨ੍ਹ ਕੇ ਰੱਖ ਦਿੱਤਾ ਗਿਆ। ਸਮਾਗਮ ਦੌਰਾਨ ਸਰਵ ਸ੍ਰੀ ਬੌਬ ਚੱਢਾ (ਸਾਬਕਾ ਕੌਂਸਲਰ), ਸ੍ਰੀਮਤੀ ਕਾਂਤਾ ਸੂਦ, ਸ੍ਰੀਮਤੀ ਪਰਭਾਕਰ, ਆਦਰਸ਼ ਖੁੱਲਰ, ਐਂਡਰਿਊ ਲਾਲ, ਸ਼ਾਂਤੀ ਪਰਭਾਕਰ, ਬਲਦੇਵ ਸੂਦ, ਵਿਨੋਦ ਸ਼ਰਮਾ, ਸ਼ੀਲਾ ਮੁਖਰਜੀ, ਸੈਂਟਰਲ ਗੁਰਦੁਆਰਾ ਸਿੰਘ ਸਭਾ ਦੇ ਪ੍ਰਧਾਨ ਸੁਰਜੀਤ ਸਿੰਘ ਚੌਧਰੀ ਆਦਿ ਨਾਮਵਾਰ ਹਸਤੀਆਂ ਨੇ ਸਮਾਗਮ ਵਿੱਚ ਸ਼ਿਰਕਤ ਕੀਤੀ। ਅੰਤ ਵਿਚ ਐਸੋਸੀਏਸ਼ਨ ਆਫ ਇੰਡੀਅਨ ਸੰਸਥਾ ਦੇ ਸਮੂਹ ਮੈਂਬਰਾਨ ਵੱਲੋਂ ਸਮਾਗਮ ਦੀ ਸਫਲਤਾ ਲਈ ਹਾਜਰੀਨ ਦਾ ਧੰਨਵਾਦ ਕੀਤਾ ਗਿਆ।
