ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)ਸਕਾਟਲੈਂਡ ਵਿੱਚ ਮਹਿਲਾਵਾਂ ਦੀ ਇੱਕ ਪਹਿਲੀ ਰਿਲੇਅ ਟੀਮ ਜੋ ਕਿ ਕਾਉਂਟੀ ਡਾਉਨ ਨਾਲ ਸਬੰਧਤ ਹਨ , ਨੇ ਉੱਤਰੀ ਆਇਰਲੈਂਡ ਅਤੇ ਸਕਾਟਲੈਂਡ ਦਰਮਿਆਨ ਪਾਣੀ ਦੇ ਚੈਨਲ ਨੂੰ ਪਾਰ ਕੀਤਾ ਹੈ। ਡਾਲ ਰਿਆਟਾ ਚੈਨਲ ਦੀ ਮਲ ਆਫ ਕੰਟਾਇਰ ਅਤੇ ਕਾਉਂਟੀ ਐਂਟਰਿਮ ਸਮੁੰਦਰੀ ਤੱਟ ਦੇ ਵਿਚਕਾਰ ਦੀ ਤਕਰੀਬਨ 17 ਕਿਲੋਮੀਟਰ ਦੀ ਦੂਰੀ ਤੇਜ਼ ਲਹਿਰਾਂ ਦੇ ਕਾਰਨ, ਤੈਰਾਕੀ ਦੀ ਅਸਲ ਦੂਰੀ 35.3 ਕਿਲੋਮੀਟਰ ਤੱਕ ਹੋ ਗਈ ਸੀ। ਜੇਨ ਰੀਲੀ, ਗ੍ਰੇਸ ਮੈਕਲੌਫਲਿਨ, ਗਿਲਿਅਨ ਸੇਗਾਸਬੀ ਅਤੇ ਨੂਆਲਾ ਗਲਾਈਨ ਆਦਿ ਮਹਿਲਾਵਾਂ ਦੇ ਗਰੁੱਪ ਨੇ ਸਿਰਫ ਅੱਠ ਘੰਟਿਆਂ ਵਿੱਚ ਆਪਣੀ ਤੈਰਾਕੀ ਮੁਹਿੰਮ ਨੂੰ ਪੂਰਾ ਕੀਤਾ। ਇਸ ਰਿਲੇਅ ਟੀਮ ਨੇ ਸ਼ਨੀਵਾਰ ਦੇ ਸ਼ੁਰੂਆਤੀ ਘੰਟਿਆਂ ਵਿੱਚ ਆਪਣੀ ਪਹਿਲੀ ਕੋਸ਼ਿਸ਼ ਕੀਤੀ ਸੀ, ਪਰ ਖ਼ਤਰਨਾਕ ਲਹਿਰਾਂ ਦੇ ਨਤੀਜੇ ਵਜੋਂ ਯੋਜਨਾ ਨੂੰ ਆਖਰੀ ਮਿੰਟ ਵਿੱਚ ਛੱਡ ਦਿੱਤਾ ਸੀ।
ਇਸ ਕਰਕੇ ਕਾਫੀ ਇੰਤਜ਼ਾਰ ਕਰਨ ਦੇ ਬਾਅਦ ਫਿਰ ਸਵੇਰੇ 6 ਵਜੇ ਇਹ ਟੀਮ ਤੈਰਾਕੀ ਲਈ ਵਾਪਸ ਆਈ। ਟੀਮ ਦੀ ਇੱਕ ਮੈਂਬਰ ਜੇਨ ਰੀਲੀ ਨੇ ਦੱਸਿਆ ਕਿ ਚੈਨਲ ਦੀ ਦੂਰੀ ਇਕ ਸਿੱਧੀ ਲਾਈਨ ਵਿੱਚ 17 ਕਿਲੋਮੀਟਰ ਹੈ, ਪਰ ਲਹਿਰਾਂ ਦੇ ਕਾਰਨ ਇਹ ਦੁੱਗਣੀ ਹੋ ਗਈ। ਇਹ ਤੈਰਾਕੀ ਸਵੇਰੇ 10 ਵਜੇ ਤੋਂ ਤੁਰੰਤ ਬਾਅਦ ਸ਼ੁਰੂ ਹੋਈ, ਜਿਸ ਦੌਰਾਨ ਪਾਣੀ ਦਾ ਤਾਪਮਾਨ 11 ਡਿਗਰੀ ਸੈਲਸੀਅਸ ਸੀ। ਟੀਮ ਦੇ ਹਰੇਕ ਮੈਂਬਰ ਨੇ ਅੱਠ ਘੰਟੇ ਅਤੇ ਸੱਤ ਮਿੰਟ ਵਿੱਚ ਦੋ ਵਾਰ ਤੈਰਾਕੀ ਕੀਤੀ ਅਤੇ ਪ੍ਰਤੀ ਮਿੰਟ ਵਿੱਚ 70 ਸਟਰੋਕ ਨਾਲ ਤੈਰਾਕੀ ਕੀਤੀ।
ਜਿਕਰਯੋਗ ਹੈ ਕਿ ਪੇਸ਼ੇਵਰ ਤੈਰਾਕ ਮਰਸੀਡੀਜ਼ ਗਲਾਈਟਜ਼ ਨੇ 1928 ਵਿੱਚ ਡਾਲ ਰਿਆਟਾ ਚੈਨਲ ਨੂੰ ਪਾਰ ਕਰਨ ਦੀ ਇੱਕ ਅਸਫਲ ਕੋਸ਼ਿਸ਼ ਕੀਤੀ ਸੀ ਅਤੇ ਇਸਨੂੰ ਪਾਰ ਕਰਨ ਦੀ ਪਹਿਲੀ ਸਫਲ ਕੋਸ਼ਿਸ਼ ਦੱਖਣੀ ਅਫਰੀਕਾ ਦੇ ਵੇਨ ਸਾਉਟਰ ਦੁਆਰਾ 2012 ਵਿੱਚ ਕੀਤੀ ਗਈ ਸੀ। ਉਸਨੇ 12 ਘੰਟੇ, 11 ਮਿੰਟ ਵਿੱਚ ਤੈਰਾਕੀ ਨੂੰ ਪੂਰਾ ਕੀਤਾ ਸੀ। ਇਸ ਨੂੰ ਪੂਰਾ ਕਰਨ ਵਾਲੀ ਰਿਲੇਅ ਟੀਮ ਇੱਕ ਸਾਲ ਤੋਂ ਵੱਧ ਸਮੇਂ ਤੋਂ ਸਮੁੰਦਰੀ ਕੰਢਿਆਂ ‘ਤੇ ਖੁੱਲ੍ਹੇ ਪਾਣੀ ਦੀ ਸਿਖਲਾਈ ਲੈ ਰਹੀ ਹੈ, ਪਰ ਸਾਬਕਾ ਵਾਟਰ ਪੋਲੋ ਖਿਡਾਰੀ ਜੇਨ ਇਕਲੌਤੀ ਮੈਂਬਰ ਹੈ ਜਿਸ ਨੇ ਪਹਿਲਾਂ ਇੱਕ ਚੈਨਲ ਨੂੰ ਪਾਰ ਕੀਤਾ ਸੀ।
