ਫਰਿਜ਼ਨੋ,ਕੈਲੀਫੋਰਨੀਆਂ (ਗੁਰਿੰਦਰਜੀਤ ਨੀਟਾ ਮਾਛੀਕੇ / ਕੁਲਵੰਤ ਧਾਲੀਆਂ) ਅਮਰੀਕਾ ਵਿੱਚ ਆਵਾਜਾਈ ਅਧਿਕਾਰੀਆਂ ਵੱਲੋਂ ਇੱਕ ਇੰਸਪੈਕਟਰ ਨੂੰ ਪੁਲ ਦੇ ਵਿੱਚ ਆਈ ਹੋਈ ਤਰੇੜ ਨੂੰ ਧਿਆਨ ਵਿੱਚ ਨਾ ਲਿਆਉਣ ਕਰਕੇ ਬਰਖਾਸਤ ਕੀਤਾ ਗਿਆ ਹੈ। ਇਸ ਮਾਮਲੇ ਵਿੱਚ ਅਰਕਨਸਾਸ ਸੂਬੇ ਦੇ ਆਵਾਜਾਈ ਅਧਿਕਾਰੀਆਂ ਨੇ ਸੋਮਵਾਰ ਨੂੰ ਦੱਸਿਆ ਕਿ ਇੱਕ ਇੰਸਪੈਕਟਰ ਨੂੰ ,ਅਰਕਨਸਾਸ ਅਤੇ ਟੈਨੇਸੀ ਨੂੰ ਜੋੜਨ ਵਾਲੇ ਇੰਟਰਸਟੇਟ 40 ਦੇ ਪੁਲ ਵਿੱਚ ਆਈ ਹੋਈ ਤਰੇੜ ਨੂੰ ਦੋ ਵਾਰ ਨੋਟਿਸ ਕਰਨ ਵਿੱਚ ਅਸਫਲ ਰਹਿਣ ਕਰਕੇ ਨੌਕਰੀ ਤੋਂ ਕੱਢਿਆ ਗਿਆ ਹੈ। ਅਰਕਨਸਾਸ ਦੇ ਟਰਾਂਸਪੋਰਟੇਸ਼ਨ ਦੀ ਡਾਇਰੈਕਟਰ ਲੌਰੀ ਟਿਊਡਰ ਅਨੁਸਾਰ ਮਈ 2019 ਵਿੱਚ ਮਿਸੀਸਿਪੀ ਨਦੀ ਦੇ ਪੁਲ ‘ਤੇ ਪਈ ਤਰੇੜ ਨੂੰ ਡਰੋਨ ਦੀ ਵੀਡੀਓ ਰਾਹੀਂ ਸਾਹਮਣੇ ਆਉਣ ਤੋਂ ਬਾਅਦ ਇੰਸਪੈਕਟਰ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ। ਇਸ ਇੰਸਪੈਕਟਰ ਵੱਲੋਂ ਉਸਦੀਆਂ ਰਿਪੋਰਟਾਂ ਵਿੱਚ ਤਰੇੜ ਦਾ ਪਤਾ ਨਹੀਂ ਲਗਾਇਆ ਗਿਆ ਸੀ। ਵਿਭਾਗੀ ਜਾਂਚ ਦੇ ਅਨੁਸਾਰ ਇਸ ਕਰਮਚਾਰੀ ਨੇ 2019 ਅਤੇ 2020 ਵਿੱਚ ਪੁਲ ਦਾ ਨਿਰੀਖਣ ਕੀਤਾ ਸੀ ਅਤੇ ਆਪਣੀਆਂ ਜ਼ਿੰਮੇਵਾਰੀਆਂ ਨੂੰ ਸਹੀ ਢੰਗ ਨਾਲ ਨਿਭਾਉਣ ਵਿੱਚ ਅਸਫਲ ਰਿਹਾ ਜੋ ਕਿ ਮਨਜ਼ੂਰ ਨਹੀਂ ਹੈ।
ਹਾਲਾਂਕਿ ਵਿਭਾਗ ਨੇ ਕਰਮਚਾਰੀ ਦਾ ਨਾਮ ਨਹੀਂ ਦੱਸਿਆ ਹੈ । ਅਰਕਨਸਾਸ ਦੇ ਡੀ ਓ ਟੀ ਨੇ ਸੋਮਵਾਰ ਨੂੰ ਡਰੋਨ ਦੁਆਰਾ ਲਈ ਗਈ ਇੱਕ ਫੋਟੋ ਅਤੇ ਵੀਡੀਓ ਨੂੰ ਜਾਰੀ ਕੀਤਾ ਹੈ, ਜਿਸ ਵਿੱਚ ਇਹ ਕਰੈਕ ਦਿਖਾਈ ਦਿੱਤਾ ਹੈ। ਇਸ ਡਰੋਨ ਦੀ ਫੁਟੇਜ ਇੱਕ ਅਧਿਕਾਰੀ ਵੱਲੋਂ ਪੁਲ ਦੀਆਂ ਤਾਰਾਂ ਦਾ ਮੁਆਇਨਾ ਕਰਦਿਆਂ ਲਈ ਗਈ ਸੀ। ਇਸ ਛੇ ਲੇਨ ਵਾਲੇ ਪੁਲ ‘ਤੇ ਟ੍ਰੈਫਿਕ ਨੂੰ ਸੁਰੱਖਿਆ ਦੇ ਮੱਦੇਨਜ਼ਰ ਪਿਛਲੇ ਮੰਗਲਵਾਰ ਨੂੰ ਬੰਦ ਕਰ ਦਿੱਤਾ ਗਿਆ ਸੀ । ਇੰਸਪੈਕਟਰਾਂ ਨੇ 900 ਫੁੱਟ ਦੇ ਸਟੀਲ ਦੇ ਬੀਮ ਵਿੱਚ ਤਰੇੜ ਨੂੰ ਲੱਭਿਆ ਸੀ ਜੋ ਕਿ ਪੁਲ ਦੀ ਸਥਿਤੀ ਲਈ ਨਾਜ਼ੁਕ ਸੀ।ਟਿਊਡਰ ਅਨੁਸਾਰ ਬਰਖਾਸਤ ਕੀਤੇ ਕਰਮਚਾਰੀ ਦੁਆਰਾ ਜਾਂਚ ਕੀਤੇ ਗਏ ਸਾਰੇ ਪੁਲਾਂ ਦਾ ਮੁੜ ਤੋਂ ਮੁਆਇਨਾ ਕੀਤਾ ਜਾਵੇਗਾ ਕਿਉਂਕਿ ਲੱਗਭਗ 15 ਸਾਲਾਂ ਤੋਂ ਵਿਭਾਗ ਲਈ ਕੰਮ ਕਰਨ ਵਾਲੇ ਕਰਮਚਾਰੀ ਨੇ ਪੁਲ ਦੇ ਮੁਆਇਨੇ ਵਿੱਚ ਸਹੀ ਪ੍ਰੋਟੋਕੋਲ ਦੀ ਪਾਲਣਾ ਨਹੀਂ ਕੀਤੀ।
