ਨਵਾਂਸ਼ਹਿਰ (ਏ-ਆਰ. ਆਰ. ਐੱਸ. ਸੰਧੂ) ਜ਼ਿਲਾ ਮੈਜਿਸਟ੍ਰੇਟ ਸ਼ਹੀਦ ਭਗਤ ਸਿੰਘ ਨਗਰ ਡਾ. ਸ਼ੇਨਾ ਅਗਰਵਾਲ ਨੇ ਅਨਲਾਕ-3 ਸਬੰਧੀ ਜਾਰੀ ਹੋਈਆਂ ਪਹਿਲੀਆਂ ਹਦਾਇਤਾਂ ਦੀ ਲਗਾਤਾਰਤਾ ਵਿਚ ਯੋਗ ਕੇਂਦਰਾਂ ਅਤੇ ਜਿਮਨੇਜੀਅਮ ਨੂੰ ਸ਼ਰਤਾਂ ਸਹਿਤ ਖੋਲਣ ਦੀ ਆਗਿਆ ਦੇ ਹੁਕਮ ਜਾਰੀ ਕੀਤੇ ਹਨ। ਜਾਰੀ ਹੁਕਮਾਂ ਅਨੁਸਾਰ ਕੋਰੋਨਾ ਦੇ ਫੈਲਾਅ ਨੂੰ ਰੋਕਣ ਸਬੰਧੀ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਨ ਦੀ ਸ਼ਰਤ ’ਤੇ ਜ਼ਿਲਾ ਸ਼ਹੀਦ ਭਗਤ ਸਿੰਘ ਨਗਰ ਦੀ ਹਦੂਦ ਅੰਦਰ 5 ਅਗਸਤ 2020 ਤੋਂ ਯੋਗ ਕੇਂਦਰ ਅਤੇ ਜਿਮਨੇਜੀਅਮ ਖੋਲਣ ਦੀ ਆਗਿਆ ਦਿੱਤੀ ਗਈ ਹੈ ਜਦਕਿ ਕਨਟੇਨਮੈਂਟ ਜ਼ੋਨ ਵਿਚ ਸਾਰੇ ਯੋਗ ਕੇਂਦਰ ਅਤੇ ਜਿਮਨੇਜੀਅਮ ਬੰਦ ਰਹਿਣਗੇ। ਇਸੇ ਤਰਾਂ ਸਪਾ, ਸਾਉਨਾ, ਸਟੀਮ ਬਾਥ ਅਤੇ ਸਵੀਮਿੰਗ ਪੂਲ ਫਿਲਹਾਲ ਬੰਦ ਰਹਿਣਗੇ।
ਜਾਰੀ ਹੁਕਮਾਂ ਅਨੁਸਾਰ ਜਿਮਨੇਜੀਅਮ ਅਤੇ ਯੋਗ ਕੇਂਦਰਾਂ ਦੇ ਸਾਰੇ ਸਟਾਫ ਮੈਂਬਰਾਂ ਅਤੇ ਆਉਣ ਵਾਲਿਆਂ ਵਿਚਾਲੇ ਸਰੀਰਕ ਸੰਪਰਕ ਘੱਟ ਤੋਂ ਘੱਟ ਹੋਵੇ ਅਤੇ ਆਪਸ ਵਿਚ ਘੱਟੋ-ਘੱਟ 6 ਫੁੱਟ ਦੀ ਸਮਾਜਿਕ ਵਿੱਥ ਰੱਖੀ ਜਾਵੇ। ਲੰਬੇ ਸਮੇਂ ਤੋਂ ਬਿਮਾਰ, 65 ਸਾਲ ਤੋਂ ਵੱਧ ਉਮਰ ਦੇ ਵਿਅਕਤੀ, ਗਰਭਵਤੀ ਔਰਤਾਂ ਅਤੇ 10 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਬੰਣ ਸਥਾਨਾਂ ਅਤੇ ਜਿਮ ਦੀ ਵਰਤੋਂ ਨਾ ਕਰਨ ਦੀ ਸਲਾਹ ਦਿੱਤੀ ਗਈ ਹੈ। ਫੇਸ ਮਾਸਕ ਦੀ ਵਰਤੋਂ ਹਰ ਸਮੇਂ ਲਾਜ਼ਮੀ ਹੋਵੇਗੀ। ਜਿਥੋਂ ਤੱਕ ਸੰਭਵ ਹੋ ਸਕੇ ਯੋਗ ਅਭਿਆਸ ਦੌਰਾਨ ਜਾਂ ਜਿਮ ਵਿਚ ਕਸਰਤ ਕਰਦੇ ਹੋਏ ਵਿਜਰ (ਮੂੰਹ ਕਵਰ ਕਰਨ ਵਾਲਾ) ਦੀ ਵਰਤੋਂ ਕੀਤੀ ਜਾਵੇ। ਜਿਮਨੇਜੀਅਮ ਅਤੇ ਯੋਗ ਸੰਸਥਾਨ ਦੇ ਪ੍ਰਬੰਧਕ ਇਹ ਯਕੀਨੀ ਬਣਾਉਣਗੇ ਕਿ ਹਰੇਕ ਵਿਅਕਤੀ ਲਈ 4 ਵਰਗ ਮੀਟਰ ਭਾਵ ਕਰੀਬ 40 ਵਰਗ ਫੁੱਟ ਜਗਾ ਹੋਵੇ। ਉਦਾਹਰਣ ਵਜੋਂ ਜੇਕਰ ਕਸਰਤ ਕਰਨ ਵਾਲੇ ਕਮਰੇ ਦਾ ਸਾਈਜ਼ 1000 ਵਰਗ ਫੁੱਟ ਹੈ ਤਾਂ ਇਕ ਸਮੇਂ ’ਤੇ ਵੱਧ ਤੋਂ ਵੱਧ 25 ਵਿਅਕਤੀਆਂ ਦੀ ਹੀ ਇਜਾਜ਼ਤ ਹੋਵੇਗੀ। ਕਸਰਤ ਦਾ ਪ੍ਰਬੰਧ ਇਸ ਤਰਾ ਹੋਵੇ ਕਿ 2 ਵਿਅਕਤੀਆਂ ਵਿਚਕਾਰ ਘੱਟੋ-ਘੱਟ 6 ਫੁੱਟ ਦੀ ਦੂਰੀ ਹੋਵੇ। ਏਅਰ ਕੰਡੀਸ਼ਨਿੰਗ/ਵੈਂਟੀਲੇਸ਼ਨ ਲਈ ਸੈਂਟਰ ਪਬਲਿਕ ਵਰਕਸ ਵਿਭਾਗਾਂ ਦੇ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਕੀਤੀ ਜਾਵੇ, ਜਿਸਦੇ ਅਨੁਸਾਰ ਕਮਰੇ ਦਾ ਤਾਪਮਾਨ 24 ਤੋਂ 30 ਡਿਗਰੀ ਸੈਲਸੀਅਸ ਦੇ ਵਿਚਕਾਰ ਹੋਣਾ ਚਾਹੀਦਾ ਹੈ। ਜਿਥੋਂ ਤੱਕ ਸੰਭਵ ਹੋ ਸਕੇ, ਤਾਜ਼ੀ ਹਵਾ ਦੀ ਵਰਤੋਂ ਅਤੇ ਹਵਾ ਦੀ ਕਰਾਸਿੰਗ ਹੋਣੀ ਚਾਹੀਦੀ ਹੈ। ਉਪਰੋਕਤ ਹੁਕਮਾਂ ਦੀ ਪਾਲਣਾ ਨਾ ਕਰਨ ਵਾਲੇ ਵਿਅਕਤੀਆਂ ਅਤੇ ਅਦਾਰਿਆਂ ਖਿਲਾਫ਼ ਕਾਨੂੰਨੀ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ।
