ਐਬੋਰਿਜਿਨਲ ਆਗੂਆਂ ਵੱਲੋਂ ਨਿਆਂ ਪ੍ਰਣਾਲੀ ‘ਚ ਸੁਧਾਰਾਂ ਦੀ ਮੰਗ
ਬ੍ਰਿਸਬੇਨ (ਹਰਜੀਤ ਲਸਾੜਾ) ਸੂਬਾ ਕੁਈਨਜ਼ਲੈਂਡ ਦੇ ਹਜ਼ਾਰਾਂ ਲੋਕਾਂ ਨੇ ਸਵਦੇਸ਼ੀ ਆਸਟਰੇਲਿਆਈਆਂ ਵਿਰੁੱਧ ਪੁਲਿਸ ਦੀ ਬੇਰਹਿਮੀ ਦਾ ਵਿਰੋਧ ਕਰਨ ਅਤੇ ਹਿਰਾਸਤ ਵਿਚ ਮਰਨ ਵਾਲਿਆਂ ਲਈ ਇਨਸਾਫ ਦੀ ਮੰਗ ਕਰਦਿਆਂ ਬ੍ਰਿਸਬੇਨ ਸ਼ਹਿਰ ਵਿਖੇ ਜੋਰਦਾਰ ਵਿਰੋਧ ਪ੍ਰਦਰਸ਼ਨ ਕੀਤਾ ਗਿਆ। ਇੱਥੇ ਭੀੜ ਨੇ ਕਿੰਗ ਜੌਰਜ ਸਕੁਆਇਰ ਤੋਂ ਲਾਗਲੇ ਬਲਾਕਾਂ ਦੀਆਂ ਪੌੜੀਆਂ ਅਤੇ ਬਾਲਕੋਨੀਆਂ ਨੂੰ ਨਿਸ਼ਾਨਾ ਬਣਾਉਂਦਿਆਂ ਆਪਣੇ ਗੁੱਸੇ ਦਾ ਇਜ਼ਹਾਰ ਕੀਤਾ ਅਤੇ ਸਰਕਾਰ ਤੋਂ ਸੁਧਾਰਾਂ ਦੀ ਮੰਗ ਲਈ ਨਾਹਰੇ ਵੀ ਲਗਾਏ।
ਆਗੂ ਐਡਰੀਅਨ ਬੁਰਗਗੱਬਾ ਨੇ ਤਿੱਖੇ ਸੁਰ ‘ਚ ਕਿਹਾ ਕਿ ਜਿਹੜਾ ਨਿਜ਼ਾਮ ਸਾਡੀ ਆਜ਼ਾਦੀ ਖੋਹ ਲੈਂਦਾ ਹੈ, ਸਾਡੀ ਆਵਾਜ਼ ਤੇ ਹੱਕ ਨੂੰ ਦਬਾਉਂਦਾ ਹੈ ਅਤੇ ਸਾਡੇ ਆਜ਼ਾਦ ਹੋਣ ਦੇ ਸੰਵਿਧਾਨਿਕ ਹੱਕ ਨੂੰ ਨਸਲਵਾਦ ਦਾ ਮਖੌਟਾ ਪਹਿਨਾਉਂਦਾ ਹੈ ਉਸ ਤੰਤਰ ਵਿਰੁੱਧ ਬੋਲਣਾ ਸਾਡਾ ਅਧਿਕਾਰ ਹੈ। ਉਹਨਾਂ ਆਪਣੀ ਤਕਰੀਰ ਜ਼ਰੀਏ ਸਮੂਹ ਪੀੜਤ ਪਰਿਵਾਰਾਂ ਲਈ ਸਰਕਾਰ ਤੋਂ ਸਹਾਇਤਾ ਦੀ ਮੰਗ ਕੀਤੀ ਜਿਨ੍ਹਾਂ ਦੇ ਅਜ਼ੀਜ਼ਾਂ ਦੀ ਹਿਰਾਸਤ ਵਿੱਚ ਮੌਤ ਹੋ ਚੁੱਕੀ ਹੈ। ਉਹਨਾਂ ਹੋਰ ਕਿਹਾ ਕਿ ਜਦੋਂ ਸਾਡੇ ਆਪਣੇ ਲੋਕ ਪੁਲਸ ਹਿਰਾਸਤਾਂ ਵਿਚ ਮਰ ਰਹੇ ਹਨ ਤਾਂ ਸਾਨੂੰ ਆਪਣੇ ਅਧਿਕਾਰਾਂ ਦੀ ਰਾਖੀ ਲਈ ਜੂਝਣਾ ਹੀ ਪਵੇਗਾ।
ਰਾਜ ਦੇ ਵਾਤਾਵਰਣ ਮੰਤਰੀ ਲੀਏਨ ਐਨੋਚ ਨੇ ਇਕ ਵੱਖਰੀ ਮੀਡੀਆ ਬੈਠਕ ‘ਚ ਕੁਈਨਜ਼ਲੈਂਡ ਵਾਸੀਆਂ ਨੂੰ ਆਪਣੇ ਹੱਕਾਂ ਬਾਬਤ ਬੋਲਣ ਲਈ ਉਤਸ਼ਾਹਿਤ ਕੀਤਾ। ਉਹਨਾਂ ਕਿਹਾ ਕਿ ਇਹ ਮਸਲਾ ਸਿਰਫ਼ ਇਕ ਦਿਨ ਲਈ ਨਹੀਂ, ਬਲਕਿ ਹਰ ਦਿਨ ਬਦਲਣ ਦਾ ਹੈ।
ਗੌਰਤਲਬ ਹੈ ਕਿ ਬ੍ਰਿਸਬੇਨ ਦਾ ਵਿਰੋਧ ਵਿਸ਼ਵਵਿਆਪੀ ਬਲੈਕ ਲਿਵਜ਼ ਮੈਟਰ ਅੰਦੋਲਨ ਦੇ ਸਮਰਥਨ ਵਿੱਚ ਬਹੁਤ ਸਾਰੇ ਲੋਕਾਂ ਵਿੱਚੋਂ ਇੱਕ ਹੈ, ਜਿਸ ਵਿੱਚ ਮਿਨੀਏਪੋਲਿਸ ਵਿੱਚ ਗ੍ਰਿਫਤਾਰ ਕੀਤੇ ਜਾਣ ਸਮੇਂ ਅਫਰੀਕੀ ਮੂਲ ਦੇ ਅਮਰੀਕੀ ਵਿਅਕਤੀ ਜਾਰਜ ਫਲਾਇਡ ਦੀ ਮੌਤ ਤੋਂ ਬਾਅਦ ਜਨਤਕ ਰੋਸ ਸਾਂਝਾ ਕੀਤਾ ਗਿਆ ਹੈ। ਕੁਈਨਜ਼ਲੈਂਡ ਐਬੋਰਿਜਿਨਲ ਐਂਡ ਆਈਲੈਂਡਰ ਹੈਲਥ ਕੌਂਸਲ ਨੇ ਕਿਹਾ ਕਿ ਫਲਾਇਡ ਦੀ ਮੌਤ ਦੇ ਆਲੇ-ਦੁਆਲੇ ਦੇ ਹਾਲਾਤ ਆਸਟਰੇਲੀਆ ਦੇ ਘੱਟਗਿਣਤੀ ਭਾਈਚਾਰਿਆਂ ਲਈ ਬਹੁਤ ਜਾਣੂ ਸਨ। ਦੱਸਣਯੋਗ ਹੈ ਕਿ 1991 ਦੀ ਕਸਟਡੀ ਰਿਪੋਰਟ ਵਿਚ ਰਾਇਲ ਕਮਿਸ਼ਨ ਦੁਆਰਾ ਆਦਿਵਾਸੀ ਮੌਤ ਦੇ ਮਾਮਲੇ ਵਿਚ ਆਸਟਰੇਲੀਆ ‘ਚ ਪੁਲਿਸ ਹਿਰਾਸਤ ਵਿਚ ਘੱਟੋ-ਘੱਟ 432 ਆਦਿਵਾਸੀ ਅਤੇ ਟੋਰਸ ਸਟਰੇਟ ਆਈਲੈਂਡਰ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇੱਥੇ ਐਬੋਰਿਜਿਨਲ ਆਗੂਆਂ ਅਤੇ ਸੂਬਾ ਕੁਈਨਜ਼ਲੈਂਡ ਦੇ ਮਨੁੱਖੀ ਅਧਿਕਾਰ ਕਮਿਸ਼ਨਰ ਸਕਾਟ ਮੈਕਡੌਗਲ ਨੇ ਆਸਟਰੇਲਿਆਈ ਸਰਕਾਰ ਤੋ ਆਦਿਵਾਸੀ ਅਤੇ ਟੋਰਸ ਸਟਰੇਟ ਆਈਲੈਂਡਰ ਭਾਈਚਾਰਿਆਂ ਦੀ ਬਿਹਤਰੀ ਲਈ ਚੰਗੀ ਨਿਆਂ ਪ੍ਰਣਾਲੀ ਤੇ ਵਧੀਆ ਸਿਹਤ ਸਹੂਲਤਾਂ ਦੀ ਮੰਗ ਕੀਤੀ।
