ਅੰਮ੍ਰਿਤਸਰ, ਮੀਡੀਆ ਬਿਊਰੋ:
ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਹੋਈ ਸੁੰਦਰ ਨੱਕਾਸ਼ੀ ’ਚੋਂ ਬੇਸ਼ਕੀਮਤੀ ਨਗਾਂ ਦੇ ਗ਼ਾਇਬ ਹੋਣ ਦੇ ਮਾਮਲੇ ’ਤੇ ਪਰਦਾ ਪਾਉਣ ਦੀਆਂ ਕੋਸ਼ਿਸ਼ਾਂ ਸ਼ੁਰੂ ਹੋ ਗਈਆਂ ਹਨ। ਇਸ ਵਾਸਤੇ ਸ੍ਰੀ ਦਰਬਾਰ ਸਾਹਿਬ ਦੇ ਮੈਨੇਜਰ ਨੇ ਇਕ ਸਰਟੀਫਿਕੇਟ ਤਿਆਰ ਕਰਵਾਇਆ ਹੈ, ਜਿਹਡ਼ਾ ਸ਼ੱਕ ਦੇ ਘੇਰੇ ਵਿਚ ਹੈ।
ਮੈਨੇਜਰ ਸੁਲੱਖਣ ਸਿੰਘ ਭੰਗਾਲੀ ਨੇ ਪ੍ਰਦੁਮਣ ਸਿੰਘ ਜਿਊਲਰਜ਼ 1987/4 ਗੁਰੂ ਬਾਜ਼ਾਰ ਅੰਮ੍ਰਿਤਸਰ ਦੇ ਲੈਟਰਹੈੱਡ ’ਤੇ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਲੱਗੇ ਨਗਾਂ ਦੀ ਜਾਂਚ ਕਰਵਾ ਕੇ ਇਸ ਨੂੰ ਆਮ ਨਗ ਵਜੋਂ ਮਾਨਤਾ ਦੇ ਦਿੱਤੀ ਹੈ। ਸਰਟੀਫਿਕੇਟ ਮੈਨੇਜਰ ਸ੍ਰੀ ਦਰਬਾਰ ਸਾਹਿਬ ਦੇ ਨਾਂ ’ਤੇ ਤਿਆਰ ਕੀਤਾ ਗਿਆ ਹੈ। ਇਸ ਵਿਚ ਲਿਖਿਆ ਗਿਆ ਹੈ ਕਿ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਮੀਨਾਕਾਰੀ ’ਚ ਜਿਹਡ਼ੇ ਸਟੋਨ ਲੱਗੇ ਹੋਏ ਹਨ, ਉਹ ਨਾ ਤਾਂ ਡਾਇਮੰਡ ਹਨ ਅਤੇ ਨਾ ਹੀ ਸੁੱਚੇ ਮਹਿੰਗੇ ਸਟੋਨ ਹਨ। ਇਹ ਸਿਰਫ਼ ਮੀਨਾਕਾਰੀ ਨੂੰ ਚਮਕ ਦੇਣ ਵਾਸਤੇ ਆਮ ਸਟੋਨ ਹਨ। ਇਨ੍ਹਾਂ ਨੂੰ ਚੈੱਕ ਕੀਤਾ ਗਿਆ ਹੈ। ਮਨਜੀਤ ਸਿੰਘ ਨਾਂ ਦੇ ਸ਼ਖ਼ਸ ਵਲੋਂ ਆਪਣੇ ਦਸਤਖ਼ਤਾਂ ਹੇਠ 7 ਅਪ੍ਰੈਲ 2022 ਨੂੰ ਸਰਟੀਫਿਕੇਟ ਜਾਰੀ ਕੀਤਾ ਗਿਆ ਹੈ। ਸਰਟੀਫਿਕੇਟ ਜਾਰੀ ਹੋਣ ਪਿੱਛੋਂ ਮੈਨੇਜਰ ਸੁਲੱਖਣ ਸਿੰਘ ਭੰਗਾਲੀ ਨੇ ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਨੂੰ ਕਹਿ ਦਿੱਤਾ ਕਿ ਇਹ ਨਗ ਆਮ ਹਨ, ਇਸ ਦਾ ਟੈਸਟਿੰਗ ਸਰਟੀਫਿਕੇਟ ਹਾਸਲ ਕਰ ਲਿਆ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਪੁਰਾਤਨ ਨੱਕਾਸ਼ੀ ਵਿਚ ਜਿਹਡ਼ੇ ਨਗਾਂ ਦੀ ਵਰਤੋਂ ਹੋਈ ਹੈ, ਉਹ ਬੇਸ਼ਕੀਮਤੀ ਹਨ। ਲੰਬੇ ਅਰਸੇ ਤਕ ਇਸ ਬਾਰੇ ਖੋਜ ਕਰਨ ਵਾਲੇ ਡਾ. ਦਵਿੰਦਰਪਾਲ ਸਿੰਘ ਨੇ ਕਿਹਾ ਕਿ ਇਸ ਨੂੰ ਗੱਚਕਾਰੀ ਜਾਂ ਨੱਕਾਸ਼ੀ ਕਿਹਾ ਜਾਂਦਾ ਹੈ। ਇਹ ਬਹੁਤ ਹੀ ਕਾਰੀਗਰੀ ਦਾ ਕੰਮ ਹੈ। ਸੱਚਖੰਡ ਵਿਖੇ ਇਹ ਕੰਮ ਚਿੰਨਕੋਟ ਦੇ ਕਾਰੀਗਰਾਂ ਨੇ ਕੀਤਾ ਹੈ। 1880 ਦੇ ਆਸਪਾਸ ਸ਼ੁਰੂ ਹੋਏ ਇਸ ਕੰਮ ਵਿਚ ਗੁਮੇਦ, ਪੰਨਾ, ਹਕੀਕ ਆਦਿ ਨਗਾਂ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਮੀਨਾਕਾਰੀਆਂ ’ਚ ਸ਼ੀਸ਼ੇ ਦੀ ਵਰਤੋਂ ਵੀ ਹੁੰਦੀ ਹੈ। ਬਾਹਰੀ ਰੋਸ਼ਨੀ ਦੇ ਨਾਲ ਸ਼ੀਸ਼ਿਆਂ ’ਤੇ ਨਗਾਂ ਰਾਹੀਂ ਅੰਦਰ ਦੀ ਖ਼ੂਬਸੂਰਤੀ ਹੋਰ ਵੀ ਵੱਧਦੀ ਹੈ। ਇੱਥੇ ਜਿਹਡ਼ੇ ਵੀ ਨਗ ਦੀ ਵਰਤੋਂ ਕੀਤੀ ਗਈ ਹੈ, ਉਸ ਦੇ ਮੁੱਲ ਵਜੋਂ ਨਹੀਂ ਬਲਕਿ ਉਸ ਦੀ ਮਹੱਤਤਾ ਵਜੋਂ ਉਸਨੂੰ ਲਿਆ ਜਾਣਾ ਚਾਹੀਦਾ ਹੈ।
ਉਧਰ, ਸਰਟੀਫਿਕੇਟ ਦੀ ਜਾਂਚ ਸਬੰਧੀ ਜਦ ਪ੍ਰਦੁਮਣ ਸਿੰਘ ਜਿਊਲਰ ਦਾ ਟਿਕਾਣਾ 1987/4 ਗੁਰੂ ਬਾਜ਼ਾਰ ਅੰਮ੍ਰਿਤਸਰ ਵਿਖੇ ਘੋਖਿਆ ਗਿਆ ਤਾਂ ਆਲੇ-ਦੁਆਲੇ ਦੇ ਦੁਕਾਨਦਾਰਾਂ ਤੋਂ ਪਤਾ ਲੱਗਾ ਕਿ ਇਹ ਫਰਮ 10 ਸਾਲ ਪਹਿਲਾਂ ਇੱਥੇ ਕੰਮ ਕਰਦੀ ਸੀ। ਇਸ ਸਰਟੀਫਿਕੇਟ ’ਤੇ ਟਿਨ ਨੰਬਰ, ਐੱਸਟੀ ਨੰਬਰ ਤੇ ਸੀਐੱਸਟੀ ਨੰਬਰ, ਮਿਤੀ 6-7-1990 ਅੰਕਿਤ ਕੀਤਾ ਹੋਇਆ ਹੈ।
ਡੂੰਘਾਈ ਨਾਲ ਹੋਵੇਗੀ ਪਡ਼ਤਾਲ, ਦੋਸ਼ੀ ਨਹੀਂ ਬਖ਼ਸ਼ੇ ਜਾਣਗੇ
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਜਨਰਲ ਸਕੱਤਰ ਜਥੇਦਾਰ ਕਰਨੈਲ ਸਿੰਘ ਪੰਜੋਲੀ ਨੇ ਇਸ ਮੁੱਦੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਕਿਹਾ ਕਿ ਇਹ ਮਾਮਲਾ ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਨਾਲ ਜੁਡ਼ਿਆ ਹੋਇਆ ਹੈ। ਦੇਸ਼-ਵਿਦੇਸ਼ ਦੀ ਸੰਗਤ ਦੀ ਆਸਥਾ ਨੂੰ ਦੇਖਦਿਆਂ ਹੋਇਆ ਇਸ ਮਾਮਲੇ ਦੀ ਡੂੰਘਾਈ ਦੇ ਨਾਲ ਪਡ਼ਤਾਲ ਕਰਵਾਈ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਦੋਸ਼ੀ ਪਾਏ ਜਾਣ ਵਾਲੇ ਵਿਅਕਤੀ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਇਸ ਮਾਮਲੇ ਵਿਚ ਕਿਸੇ ਵੀ ਦੋਸ਼ੀ ਨੂੰ ਬਖ਼ਸ਼ਿਆ ਨਹੀਂ ਜਾਵੇਗਾ।
ਅਸਲੀ ਨਹੀਂ ਮੇਲ ਖਾਂਦੇ ਹਨ ਨਗ : ਮਨਜੀਤ ਸਿੰਘ
ਕਾਫੀ ਭਾਲ ਤੋਂ ਬਾਅਦ ਸਰਟੀਫਿਕੇਟ ਜਾਰੀ ਕਰਨ ਵਾਲੇ ਸ਼ਖ਼ਸ ਮਨਜੀਤ ਸਿੰਘ ਨਾਲ ਜਦੋਂ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਪਾਸ ਇਕ ਨਗ ਦਰਬਾਰ ਸਾਹਿਬ ਦੇ ਪ੍ਰਬੰਧਕ ਲੈ ਕੇ ਆਏ ਸਨ, ਜਿਸ ਨੂੰ ਘੋਖਣ ਤੋਂ ਬਾਅਦ ਉਨ੍ਹਾਂ ਇਹ ਮਹਿਸੂਸ ਕੀਤਾ ਕਿ ਇਹ ਨਗ ਅਸਲੀ ਨਹੀਂ, ਉਸ ਦੇ ਨਾਲ ਮੇਲ ਖਾਂਦੇ ਹਨ। ਸਰਟੀਫਿਕੇਟ ’ਤੇ ਜੋ ਵੀ ਲਿਖਿਆ ਹੈ, ਉਹ ਸ੍ਰੀ ਦਰਬਾਰ ਸਾਹਿਬ ਦੇ ਪ੍ਰਬੰਧਕਾਂ ਨੇ ਖ਼ੁਦ ਲਿਖਿਆ ਹੈ, ਕਿਉਂਕਿ ਉਨ੍ਹਾਂ ਨੂੰ ਪੰਜਾਬੀ ਨਹੀਂ ਆਉਂਦੀ, ਉਨ੍ਹਾਂ ਸਿਰਫ਼ ਦਸਤਖ਼ਤ ਕਰ ਕੇ ਹੀ ਲੈਟਰਹੈੱਡ ਦਿੱਤਾ ਹੈ। ਲੈਟਰਹੈੱਡ ’ਤੇ ਦਿੱਤੇ ਪਤੇ ਸਬੰਧੀ ਉਨ੍ਹਾਂ ਕਿਹਾ ਕਿ ਇਹ ਜਗ੍ਹਾ ਪਿਛਲੇ ਸਮੇਂ ਵਿਚ ਉਹ ਵੇਚ ਚੁੱਕੇ ਹਨ ਅਤੇ ਹੁਣ ਗੁਰਦੁਆਰਾ ਗੁਰੂ ਕੇ ਮਹਿਲ ਦੇ ਸਾਹਮਣੇ ਮਾਰਕੀਟ ਵਿਚ ਆਪਣਾ ਦਫ਼ਤਰ ਚਲਾ ਰਹੇ ਹਨ।
