ਫਰਿਜ਼ਨੋ (ਕੈਲੀਫੋਰਨੀਆ) (ਗੁਰਿੰਦਰਜੀਤ ਨੀਟਾ ਮਾਛੀਕੇ)- ਅਮਰੀਕੀ ਸੂਬੇ ਆਏ ਦਿਨ ਕੁਦਰਤੀ ਆਫਤਾਂ ਦਾ ਸਾਹਮਣਾ ਕਰਦੇ ਹੀ ਰਹਿੰਦੇ ਹਨ। ਜਿੱਥੇ ਇੱਕ ਪਾਸੇ ਕੈਲੀਫੋਰਨੀਆ ਜਿਆਦਾਤਰ ਜੰਗਲੀ ਅੱਗਾਂ ਦਾ ਸਾਹਮਣਾ ਕਰ ਰਿਹਾ ਹੈ, ਉੱਥੇ ਹੀ ਲੁਈਸਿਆਨਾ ਲਈ ਤੂਫਾਨ ਇਡਾ ਦਾ ਖਤਰਾ ਪੈਦਾ ਹੋ ਗਿਆ ਹੈ। ਲੂਈਸਿਆਨਾ ਦੇ ਗਵਰਨਰ ਜੌਨ ਬੇਲ ਐਡਵਰਡਜ਼ ਨੇ ਚੇਤਾਵਨੀ ਦਿੰਦਿਆਂ ਸੂਬੇ ਦੇ ਵਸਨੀਕਾਂ ਨੂੰ ਇਸ ਤੂਫਾਨ ਲਈ ਤਿਆਰ ਰਹਿਣ ਲਈ ਕਿਹਾ ਹੈ। ਇਹ ਤੂਫਾਨ ਸਟੇਟ ਵਿੱਚ ਆਉਣ ਵਾਲੇ ਸਭ ਤੋਂ ਸ਼ਕਤੀਸ਼ਾਲੀ ਤੂਫਾਨਾਂ ਵਿੱਚੋਂ ਇੱਕ ਹੈ, ਜਿਸਨੂੰ ਚੌਥੀ ਖਤਰਨਾਕ ਸ਼੍ਰੇਣੀ ਵਿੱਚ ਰੱਖਿਆ ਗਿਆ ਹੈ ।
ਤੂਫਾਨ ਇਡਾ ਦਾ ਐਤਵਾਰ ਨੂੰ ਲੂਈਸਿਆਨਾ ਵਿੱਚ ਆਉਣ ਦਾ ਖਦਸ਼ਾ ਹੈ।ਸ਼ਨੀਵਾਰ ਨੂੰ ਇਸ ਤੂਫਾਨ ਦੀਆਂ ਤੂਫਾਨੀ ਹਵਾਵਾਂ ਤਕਰੀਬਨ 85 ਮੀਲ ਪ੍ਰਤੀ ਘੰਟਾ ਹੋ ਗਈਆਂ ਸਨ ਅਤੇ ਅਗਲੇ 24 ਤੋਂ 36 ਘੰਟਿਆਂ ਵਿੱਚ ਹਵਾਵਾਂ ਦੀ ਤੇਜ਼ੀ ਵਧਣ ਦੀ ਉਮੀਦ ਹੈ। ਨੈਸ਼ਨਲ ਹਰੀਕੇਨ ਸੈਂਟਰ ਦੁਆਰਾ ਤੂਫਾਨ ਦੇ ਬਹੁਤ ਹੀ ਖਤਰਨਾਕ ਬਣਨ ਦੀ ਭਵਿੱਖਬਾਣੀ ਕੀਤੀ ਗਈ ਹੈ।ਗਵਰਨਰ ਐਡਵਰਡਜ਼ ਨੇ ਕਿਹਾ ਕਿ ਲੈਂਡਫਾਲ ‘ਤੇ ਹਵਾ ਦੀ ਗਤੀ 140 ਮੀਲ ਪ੍ਰਤੀ ਘੰਟਾ ਤੱਕ ਪਹੁੰਚ ਸਕਦੀ ਹੈ, ਅਤੇ ਉੱਤਰ ਵੱਲ ਲਗਾਤਾਰ ਹਵਾਵਾਂ 110 ਮੀਲ ਪ੍ਰਤੀ ਘੰਟਾ ਤੱਕ ਚੜ੍ਹ ਸਕਦੀਆਂ ਹਨ। ਇਸ ਦੇ ਨਾਲ ਹੀ ਰਾਜ ਵਿੱਚ ਐਤਵਾਰ ਤੋਂ ਮੰਗਲਵਾਰ ਤੱਕ 8 ਤੋਂ 16 ਇੰਚ ਮੀਂਹ ਦੀ ਵੀ ਉਮੀਦ ਹੈ, ਕੁਝ ਖੇਤਰਾਂ ਵਿੱਚ 20 ਇੰਚ ਤੋਂ ਵੱਧ ਦੀ ਸੰਭਾਵਨਾ ਹੈ।
ਮੌਸਮ ਮਾਹਿਰਾਂ ਅਨੁਸਾਰ ਤੂਫਾਨ 300 ਮੀਲ ਲੰਬੇ ਖੇਤਰ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ, ਜਿਸ ਨਾਲ ਨਦੀ ਵਿੱਚ ਹੜ੍ਹ ਵੀ ਆ ਸਕਦਾ ਹੈ। ਰਾਸ਼ਟਰਪਤੀ ਬਾਈਡੇਨ ਨੇ ਸ਼ੁੱਕਰਵਾਰ ਨੂੰ ਐਮਰਜੈਂਸੀ ਘੋਸ਼ਣਾ ਲਈ ਲੂਈਸਿਆਨਾ ਦੀ ਬੇਨਤੀ ਨੂੰ ਪ੍ਰਵਾਨਗੀ ਦੇ ਦਿੱਤੀ ਹੈ ਅਤੇ ਸੰਘੀ ਐਮਰਜੈਂਸੀ ਏਜੰਸੀ ਨੂੰ ਆਫਤ ਰਾਹਤ ਦੇ ਯਤਨਾਂ ਵਿੱਚ ਤਾਲਮੇਲ ਕਰਨ ਦਾ ਅਧਿਕਾਰ ਦਿੱਤਾ ਹੈ। ਅਲਾਬਾਮਾ ਦੇ ਰਾਜਪਾਲ ਕੇ ਆਈਵੇ ਅਤੇ ਮਿਸੀਸਿਪੀ ਦੇ ਰਾਜਪਾਲ ਟੇਟ ਰੀਵਜ਼ ਨੇ ਵੀ ਤੂਫਾਨ ਤੋਂ ਪਹਿਲਾਂ ਸ਼ਨੀਵਾਰ ਨੂੰ ਐਮਰਜੈਂਸੀ ਦੀ ਸਥਿਤੀ ਦਾ ਐਲਾਨ ਕੀਤਾ ਹੈ।
