ਬ੍ਰਿਸਬੇਨ (ਹਰਜੀਤ ਲਸਾੜਾ) ਆਸਟ੍ਰੇਲੀਆ ਦੇ ਸੂਬਾ ਕੁਈਨਜ਼ਲੈਂਡ ਦੇ ਸ਼ਹਿਰ ਬ੍ਰਿਸਬੇਨ ਵਿਖੇ 25 ਸਾਲਾ ਪੰਜਾਬੀ ਨੌਜਵਾਨ ਸਰਵਜੀਤ ਮੁੱਤੀ ਦੇ ਲਾਪਤਾ ਹੋਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਕੁਈਨਜਲੈਂਡ ਪੁਲਿਸ ਵਲੋਂ ਸਰਵਜੀਤ ਦੀ ਭਾਲ ਲਈ ਮੁਹਿੰਮ ਜ਼ੋਰਾਂ ‘ਤੇ ਚਲਾਈ ਜਾ ਰਹੀ ਹੈ। ਸਰਵਜੀਤ ਨੂੰ ਆਖਰੀ ਵਾਰ 24 ਮਾਰਚ ਰਾਤ ਨੂੰ ਸੇਂਟ ਲੂਸ਼ੀਆ ਦੀ ਕੁਵੀਨਜ਼ਲੈਂਡ ਯੂਨੀਵਰਸਿਟੀ ਦੇ ਕੈਂਪਸ ਵਿਖੇ ਇਕ ਕਿਸ਼ਤੀ ਰੈਂਪ ਦੇ ਨੇੜੇ ਦੇਖਿਆ ਗਿਆ ਸੀ। ਉਸ ਦੇ ਬਾਅਦ ਉਸ ਨਾਲ ਕੋਈ ਵੀ ਸੰਪਰਕ ਨਹੀਂ ਹੋ ਸਕਿਆ।
ਵਾਟਰ ਪੁਲਿਸ ਵਲੋਂ ਵੀ ਰਾਤ ਸਮੇਂ ਉਸ ਸਥਾਨ ‘ਤੇ ਛਾਣਬੀਣ ਕਰਦਿਆਂ ਨਦੀ ਵਿਚ ਵੀ ਖੋਜ ਕੀਤੀ ਗਈ ਜਦਕਿ ਖੇਤਰ ਦੀਆਂ ਪੈਦਲ ਗਸ਼ਤ ਦੇ ਨਾਲ ਨਾਲ ਹਵਾਈ ਨਿਗਰਾਨੀ ਵੀ ਕੀਤੀ ਜਾ ਰਹੀ। ਸਰਵਜੀਤ ਮੁੱਤੀ ਬਾਰੇ ਪੁਲਿਸ ਵਲੋਂ ਚਿੰਤਾ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ, ਕਿਉਂਕਿ ਉਸਦਾ ਕੁਝ ਸਮਾਨ ਕਿਸ਼ਤੀ ਰੈਂਪ ਦੇ ਆਸ ਪਾਸ ਮਿਲਿਆ ਹੈ। ਸਰਵਜੀਤ ਲਗਭਗ 175 ਸੈਂਟੀਮੀਟਰ ਲੰਬਾ, ਸਾਂਵਲਾ ਰੰਗ, ਕਾਲੇ ਵਾਲ ਅਤੇ ਦਾੜ੍ਹੀ ਵਾਲਾ ਭਾਰਤੀ ਦੱਸਿਆ ਗਿਆ ਹੈ। ਉਸਨੇ ਲਾਪਤਾ ਹੋਣ ਸਮੇਂ ਪੀਲੇ ਰੰਗ ਦੀ ਕਮੀਜ਼, ਕਾਲੀ ਪੈਂਟ, ਕਾਲੀ ਦਸਤਾਰ ਅਤੇ ਚੱਪਲ ਪਾਈ ਹੋਈ ਸੀ। ਪੁਲਿਸ ਵਲੋਂ ਅਪੀਲ ਕੀਤੀ ਗਈ ਹੈ ਕਿ ਜਿਸਨੇ ਵੀ ਸਰਵਜੀਤ ਨੂੰ ਵੇਖਿਆ ਹੋਵੇ ਜਾਂ ਉਸਦਾ ਪਤਾ ਲੱਗੇ ਤਾ ਤੁਰੰਤ ਪੁਲਿਸ ਨਾਲ 131 444 ਤੇ ਸੰਪਰਕ ਕਰਕੇ ਜਾਣਕਾਰੀ ਦਿਉ।
