ਨਵਾਂਸ਼ਹਿਰ (ਮੀਡੀਆ ਬਿਊਰੋ ) ਪੰਜਾਬ ਸਰਕਾਰ ਨੇ ਲਾਕ ਡਾਊਨ ਕਾਰਨ ਰਾਜ ਵਿੱਚ ਫ਼ਸੇ ਦੂਜੇ ਰਾਜਾਂ ਦੇ ਲੋਕਾਂ ਨੂੰ ਵੱਡੀ ਰਾਹਤ ਦਿੰਦਿਆ ਉਨ੍ਹਾਂ ਦੀ ਜਾਣਕਾਰੀ ਇਕੱਤਰ ਕਰਨ ਲਈ ਆਨ ਲਾਇਨ ਰਜਿਸਟ੍ਰੇਸ਼ਨ ਲਿੰਕ www.covidhelp.punjab.gov.in <http://www.covidhelp.punjab.gov.in> `ਤੇ ਆਪਣੀ ਰਜਿਸਟ੍ਰੇਸ਼ਨ ਕਰਨ ਲਈ ਆਖਿਆ ਹੈ।
ਡਿਪਟੀ ਕਮਿਸ਼ਨਰ ਵਿਨੈ ਬਬਲਾਨੀ ਨੇ ਇਹ ਜਾਣਕਾਰੀ ਦਿੰਦਿਆ ਦੱਸਿਆ ਕਿ ਉਕਤ ਆਨ ਲਾਇਨ ਲਿੰਕ ਤੋਂ ਇਲਾਵਾ ਜ਼ਿਲ੍ਹੇ `ਚ ਲਾਕ ਡਾਊਨ ਕਾਰਨ ਇਥੇ ਹੀ ਰਹਿ ਗਏ ਦੂਸਰੇ ਰਾਜਾਂ ਦੇ ਵਸਨੀਕ ਜੇਕਰ ਆਪਣੇ ਘਰ ਵਾਪਸ ਜਾਣ ਦੇ ਚਾਹਵਾਨ ਹਨ ਤਾਂ ਉਹ ਐਸ.ਡੀ.ਐਮ. ਦਫ਼ਤਰਾਂ `ਚ ਵੀ ਆਪਣੇ ਸੂਚਨਾ ਦਰਜ ਕਰਵਾ ਸਕਦੇ ਹਨ। ਉਨ੍ਹਾਂ ਦੱਸਿਆ ਕਿ ਇਕ ਵਾਰ ਇਸ ਆਨ ਲਾਇਨ ਲਿੰਕ `ਤੇ ਆਪਣੀ ਰਜਿਸਟੇ੍ਰਸ਼ਨ ਕਰਵਾਉਣ ਤੋਂ ਬਾਅਦ ਸਬੰਧਤ ਵਿਅਕਤੀ ਨੂੰ ਇੱਕ ਵਿਲੱਖਣ ਆਈ.ਡੀ. ਪ੍ਰਾਪਤ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਰਜਿਸਟੇ੍ਰਸ਼ਨ ਕਰਵਾਉਣ ਵਾਲੇ ਵਿਅਕਤੀ ਨੂੰ ਜ਼ਿਲ੍ਹੇ ਦੇ ਸਿਹਤ ਵਿਭਾਗ ਪਾਸੋਂ ਇੱਕ ਸਰਟੀਫਿਕੇਟ ਆਫ਼ ਫਿੱਟਨੈਸ ਲੈਣਾ ਲਾਜ਼ਮੀ ਹੋਵੇਗਾ, ਜਿਸ ਵਿੱਚ ਉਸ ਦਾ ਨਾਮ, ਮੋਬਾਇਲ, ਜਿਸ ਮਿਤੀ ਨੂੰ ਉਸ ਦੀ ਸਿਹਤ ਜਾਂਚ ਕੀਤੀ ਗਈ ਹੈ, ਉਹ ਮਿਤੀ ਪਰਿਵਾਰ/ਗਰੁੱਪ ਆਈ.ਡੀ. ਆਦਿ ਭਰਿਆ ਹੋਵੇਗਾ। ਇਸ ਸਰਟੀਫਿਕੇਟ `ਤੇ ਸਬੰਧਤ ਵਿਅਕਤੀ ਬਾਰੇ ਇਹ ਵੀ ਜਾਣਕਾਰੀ ਹੋਵੇਗੀ ਕਿ ਉਸ ਦੀ ਸਿਹਤ ਜਾਂਚ ਬਾਅਦ ਉਸ ਵਿੱਚ ਕੋਵਿਡ ਦਾ ਕੋਈ ਵੀ ਲੱਛਣ ਨਹੀਂ ਪਾਇਆ ਗਿਆ ਅਤੇ ਉਸ ਨੂੰ ਯਾਤਰਾ ਕਰਨ ਦੀ ਆਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਉਕਤ ਸਮੁੱਚੀ ਜਾਣਕਾਰੀ ਆਨ ਲਾਇਨ ਲਿੰਕ ਜਾਂ ਐਸ.ਡੀ.ਐਮ. ਦਫ਼ਤਰ `ਚ ਦੇਣ ਤੋਂ ਬਾਅਦ ਇਸ ਸੂਚੀ ਦੀ ਜ਼ਿਲ੍ਹਾ ਪੱਧਰ `ਤੇ ਸਮੀਖਿਆ ਕੀਤੀ ਜਾਵੇਗੀ ਅਤੇ ਤੰਦਰੁਸਤ ਪਾਏ ਗਏ ਵਿਅਕਤੀਆਂ ਦੀ ਵਾਪਸੀ 5 ਮਈ ਤੋਂ ਬਾਅਦ ਸ਼ੁਰੂ ਹੋਵੇਗੀ।
