ਮੁੜ ਕੋਰੋਨਾਵਾਇਰਸ ਨੂੰ ਚੀਨੀ ਵਾਇਰਸ ਕਰਾਰ ਦਿੱਤਾ
ਮੌਤਾਂ ਦੀ ਕੁਲ ਗਿਣਤੀ 1,00,572 ਹੋਈ।
ਮਾਸਕ ਬਾਰੇ ਬਿਡੇਨ ਨੇ ਕਿਹਾ ਟਰੰਪ ‘ਸਿਰੇ ਦਾ ਮੂਰਖ’
ਵਾਸ਼ਿੰਗਟਨ (ਹੁਸਨ ਲੜੋਆ ਬੰਗਾ) ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਕ ਵਾਰ ਫਿਰ ਚੀਨ ਉਪਰ ਸ਼ਬਦੀ ਹਮਲਾ ਕਰਦਿਆਂ ਕੋਰੋਨਾਵਾਇਰਸ ਨੂੰ ‘ਚੀਨੀ ਵਾਇਰਸ’ ਕਰਾਰ ਦਿੰਦਿਆਂ ਕਿਹਾ ਕਿ ਇਸ ਨੂੰ ਚੀਨ ਵਿਚ ਹੀ ਖਤਮ ਕੀਤਾ ਜਾ ਸਕਦਾ ਸੀ। ਟਰੰਪ ਨੇ ਕੋਰੋਨਵਾਇਰਸ ਨੂੰ ਰੋਕਣ ਲਈ ਆਪਣੀ ਪਿੱਠ ਥਪਥਪਾਈ ਤੇ ਕਿਹਾ ਕਿ ਜੇਕਰ ਸਮੇਂ ਸਿਰ ਉਹ ਕਾਰਵਾਈ ਨਾ ਕਰਦੇ ਤਾਂ ਮੌਤਾਂ ਦੀ ਗਿਣਤੀ ਜੋ ਇਸ ਸਮੇਂ 1 ਲੱਖ ਜਾਂ ਕੁਝ ਵਧ ਸਕਦੀ ਹੈ, 15 ਤੋਂ 20 ਲੱਖ ਤੱਕ ਹੋ ਸਕਦੀ ਸੀ।
ਉਨਾਂ ਕਿਹਾ ਕਿ ਉਨਾਂ ਬਹੁਤ ਛੇਤੀ ਚੀਨ ਤੋਂ ਦੇਸ਼ ਵਿਚ ਦਾਖਲ ਹੁੰਦੇ ਲੋਕਾਂ ਨੂੰ ਰੋਕਿਆ। ਟਰੰਪ ਨੇ ਕਿਹਾ ਕਿ ਉਨਾਂ ਵਲੋਂ ਚੁੱਕੇ ਗਏ ਕਦਮਾਂ ਸਦਕਾ ਕੋਰੋਨਾ ਮਹਾਮਾਰੀ ਉਪਰ ਨਿਯੰਤਰਣ ਹੋਇਆ ਹੈ, ਮੌਤਾਂ ਤੇ ਨਵੇਂ ਮਰੀਜ਼ਾਂ ਦੀ ਦਰ ਵਿਚ ਕਮੀ ਆਈ। ਇਸ ਦਰਮਿਆਨ ਅਮਰੀਕਾ ਵਿਚ ਕੋਰੋਨਾ ਨਾਲ ਮੌਤਾਂ ਦੀ ਗਿਣਤੀ ਇਕ ਲੱਖ ਤੋਂ ਪਾਰ ਹੋ ਗਈ ਹੈ। ਟਰੰਪ ਨੇ 3 ਦਿਨ ਪਹਿਲਾਂ ਹੀ ਮੌਤਾਂ ਦੀ ਗਿਣਤੀ ਇਕ ਲੱਖ ਹੋਣ ਦੀ ਪੁਸ਼ਟੀ ਕਰ ਦਿੱਤੀ ਸੀ।
ਮੌਤਾਂ ਇਕ ਲੱਖ ਤੋਂ ਪਾਰ-
ਅਮਰੀਕਾ ਵਿਚ ਪਿਛਲੇ 24 ਘੰਟਿਆਂ ਦੌਰਾਨ ਕੋਰੋਨਾ ਵਾਇਰਸ ਨਾਲ 767 ਮਰੀਜ਼ ਹੋਰ ਦਮ ਤੋੜ ਗਏ ਹਨ ਜਿਨਾਂ ਨਾਲ ਮੌਤਾਂ ਦੀ ਗਿਣਤੀ 1,00,572 ਹੋ ਗਈ ਹੈ। 18549 ਕੋਰੋਨਾ ਨਾਲ ਪ੍ਰਭਾਵਿਤ ਨਵੇਂ ਮਰੀਜ਼ ਹਸਪਤਾਲਾਂ ਵਿਚ ਆਏ ਹਨ ਜਿਨਾਂ ਨਾਲ ਪੀੜਤਾਂ ਦੀ ਕੁਲ ਗਿਣਤੀ 17,25,275 ਹੋ ਗਈ ਹੈ। 15299 ਮਰੀਜ਼ ਠੀਕ ਹੋਏ ਹਨ। ਠੀਕ ਹੋਏ ਮਰੀਜ਼ਾਂ ਦੀ ਕੁਲ ਗਿਣਤੀ 479969 ਹੋ ਗਈ ਹੈ। ਤੰਦਰੁਸਤ ਹੋਣ ਦੀ ਦਰ ਵਿਚ ਤੇਜੀ ਨਾਲ ਸੁਧਾਰ ਹੋਇਆ ਹੈ। ਇਹ ਦਰ 83% ‘ਤੇ ਪੁੱਜ ਗਈ ਹੈ ਜਦ ਕਿ ਮੌਤ ਦਰ ਘਟਕੇ 17% ਹੋ ਗਈ ਹੈ। ਆਸ ਕੀਤੀ ਜਾਂਦੀ ਹੈ ਕਿ ਅਗਲੇ ਦਿਨਾਂ ਦੌਰਾਨ ਮਰੀਜ਼ਾਂ ਦੀ ਸਿਹਤ ਵਿਚ ਤੇਜੀ ਨਾਲ ਸੁਧਾਰ ਆਵੇਗਾ।
ਟਰੰਪ ਨੇ ਬਿਡੇਨ ਦਾ ਉਡਾਇਆ ਮਜ਼ਾਕ-
ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਾਬਕਾ ਰਾਸ਼ਟਰਪਤੀ ਜੋ ਬਿਡੇਨ ਦੀ ਇਕ ਤਸਵੀਰ ਟਵਿਟਰ ਉਪਰ ਆਪਣੇ 8 ਕਰੋੜ ਪ੍ਰਸੰਸਕਾਂ ਨਾਲ ਸਾਂਝੀ ਕੀਤੀ ਹੈ ਜਿਸ ਵਿਚ ਬਿਡੇਨ ਮੈਮੋਰੀਅਲ ਦਿਵਸ ਮੌਕੇ ਮਾਸਕ ਪਾ ਕੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਦੇ ਰਹੇ ਹਨ। ਇਸ ਤਸਵੀਰ ਵਿਚ ਬਿਡੇਨ ਨੇ ਕਾਲੇ ਮਾਸਕ ਨਾਲ ਤਕਰੀਬਨ ਸਾਰਾ ਚੇਹਰਾ ਢੱਕਿਆ ਹੋਇਆ ਹੈ ਤੇ ਐਨਕਾਂ ਲਾਈਆਂ ਹੋਈਆਂ ਹਨ। ਕੰਜ਼ਰਵੇਟਿਵ ਰਾਜਸੀ ਵਿਸ਼ਲੇਸ਼ਣਕਾਰ ਕੋਲੋਂ ਲਈ ਇਸ ਤਸਵੀਰ ਦੇ ਹੇਠਾਂ ਕੈਪਸ਼ਨ ਇਸ ਤਰਾਂ ਲਿਖੀ ਹੋਈ ਹੈ। ‘ਇਹ ਤਸਵੀਰ ਇਹ ਸਮਝਣ ਵਿਚ ਮੱਦਦ ਕਰੇਗੀ ਕਿ ਟਰੰਪ ਜਨਤਿਕ ਤੌਰ ‘ਤੇ ਮਾਸਕ ਪਾਉਣਾ ਕਿਉਂ ਨਹੀਂ ਪਸੰਦ ਕਰਦਾ।” ਇਸ ਉਪਰ ਪ੍ਰਤੀਕਰਮ ਪ੍ਰਗਟ ਕਰਦਿਆਂ ਨਵੰਬਰ ਵਿਚ ਹੋ ਰਹੀਆਂ ਰਾਸ਼ਟਰਪਤੀ ਚੋਣਾਂ ਲਈ ਡੈਮੋਕਰੈਟਿਕ ਪਾਰਟੀ ਦੇ ਉਮੀਦਵਾਰ ਬਿਡੇਨ ਨੇ ਕਿਹਾ ਹੈ ਕਿ ਮਾਸਕ ਪਾਉਣ ਲਈ ਦੂਸਰਿਆਂ ਦਾ ਮਜ਼ਾਕ ਉਡਾਉਣ ਵਾਲਾ ‘ਟਰੰਪ ਸਿਰੇ ਦਾ ਮੂਰਖ ਹੈ।’
