ਨਵਾਂਸ਼ਹਿਰ (ਏ-ਆਰ. ਆਰ. ਐੱਸ. ਸੰਧੂ) ਜ਼ਿਲ੍ਹਾ ਪ੍ਰਸ਼ਾਸਨ ਸ਼ਹੀਦ ਭਗਤ ਸਿੰਘ ਨਗਰ ਨੇ ਅੱਜ ਜ਼ਿਲ੍ਹੇ ਦੇ ਤਿੰਨ ਸੀਲ ਕੀਤੇ ਪਿੰਡਾਂ/ਵਾਰਡਾਂ, ਜਿਨ੍ਹਾਂ ’ਚ ਕੋਵਿਡ-19 ਮਰੀਜ਼ ਸਾਹਮਣੇ ਆਉਣ ਬਾਅਦ ਕਰਵਾਈ ਗਈ ਸੈਂਪਲ਼ਿੰਗ ਵਿਚ ਸਾਰੇ ਮਾਮਲੇ ਨੈਗੇਟਿਵ ਪਾਏ ਗਏ ਸਨ ਅਤੇ ਸਬੰਧਤ ਕੋਵਿਡ-19 ਮਰੀਜ਼ ਵੀ ਸਿਹਤਯਾਬ ਹੋ ਕੇ ਘਰ ਆ ਗਏ ਸਨ, ਨੂੰ ਸਿਹਤ ਵਿਭਾਗ ਵੱਲੋਂ ਕੀਤੀ ਸਿਫ਼ਾਰਸ਼ ਬਾਅਦ ਕੰਨਟੇਨਮੈਂਟ ਜ਼ੋਨ ਤੋਂ ਬਾਹਰ ਲਿਆਉਣ ਦਾ ਫ਼ੈਸਲਾ ਕੀਤਾ ਹੈ।
ਡਿਪਟੀ ਕਮਿਸ਼ਨਰ ਵਿਨੈ ਬਬਲਾਨੀ ਨੇ ਇਹ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਨ੍ਹਾਂ ਥਾਂਵਾਂ ’ਚ ਨਵਾਂਸ਼ਹਿਰ ਦਾ ਪਿੰਡ ਜਾਡਲਾ ਤੇ ਪਿੰਡ ਗਰਚਾ ਅਤੇ ਬੰਗਾ ਸ਼ਹਿਰ ਦਾ ਸ਼ਕਤੀ ਨਗਰ ਸ਼ਾਮਿਲ ਹਨ ਜਿੱਥੇ ਕਿ ਇੱਕ-ਇੱਕ ਕੋਵਿਡ-19 ਮਰੀਜ਼ ਪਾਇਆ ਗਿਆ ਸੀ। ਉਸ ਤੋਂ ਬਾਅਦ ਕਰਵਾਈ ਸੈਂਪਲੰਿਗ ਦੌਰਾਨ ਹੋਰ ਕੋਈ ਵੀ ਮਰੀਜ਼ ਸਾਹਮਣੇ ਨਹੀਂ ਆਇਆ ਅਤੇ ਸਾਰੇ ਮਾਮਲੇ ਨੈਗੇਟਿਵ ਪਾਏ ਗਏ। ਇਸ ਤਰ੍ਹਾਂ ਇਹ ਇਲਾਕੇ ‘ਕੰਨਟੇਨਮੈਂਟ ਪਲਾਨ ਰਣਨੀਤੀ’ ਤਹਿਤ ਕਲੱਸਟਰ ਨਹੀਂ ਬਣੇ ਅਤੇ ਇਨ੍ਹਾਂ ਨੂੰ ਕੋਵਿਡ-19 ਦੇ ਨਿਯਮਾਂ ਅਨੁਸਾਰ ਲੋਕਾਂ ਨੂੰ ਦਰਪੇਸ਼ ਮੁਸ਼ਕਿਲਾਂ ਦੇ ਸਨਮੁੱਖ ਪਾਬੰਦੀਆਂ ਦੇ ਘੇਰੇ ਤੋਂ ਬਾਹਰ ਕਰ ਦਿੱਤਾ ਗਿਆ ਹੈ।ਡਿਪਟੀ ਕਮਿਸ਼ਨਰ ਨੇ ਇਸ ਦੇ ਨਾਲ ਹੀ ਇਨ੍ਹਾਂ ਪਿੰਡਾਂ ਨਾਲ ਸਬੰਧਤ ਕੋਵਿਡ-19 ਪੀੜਤ ਵਿਅਕਤੀ ਜਿਨ੍ਹਾਂ ਨੂੰ ਆਈਸੋਲੇਸ਼ਨ ਵਾਰਡਾਂ ਤੋਂ ਛੁੱਟੀ ਦਿੱਤੀ ਗਈ ਹੈ, ਨੂੰ ਆਪਣਾ ਘਰ ’ਚ ਅਲਹਿਦਗੀ/ਇਕਾਂਤਵਾਸ ਸਮਾਂ ਵੀ ਪੂਰੀ ਪ੍ਰਤੀਬੱਧਤਾ ਨਾਲ ਪੂਰਾ ਕਰਨ ਦੀ ਹਦਾਇਤ ਕੀਤੀ ਹੈ ਤਾਂ ਜੋ ਉਹ ਪੂਰੀ ਤਰ੍ਹਾਂ ਤੰਦਰੁਸਤ ਹੋਣ।
