ਨਵਾਂਸ਼ਹਿਰ (ਏ-ਆਰ. ਆਰ. ਐੱਸ. ਸੰਧੂ) ਪੰਜਾਬ ਹੋਮ ਗਾਰਡਜ਼ ਦੇ ਕਮਾਂਡੈਂਟ ਜਰਨਲ ਅਤੇ ਡਾਇਰੈਕਟਰ ਸਿਵਲ ਡਿਫ਼ੈਂਸ ਪੰਜਾਬ ਕੁਲਤਾਰਨ ਸਿੰਘ ਘੁੰਮਣ ਵੱਲੋਂ ਅੱਜ ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਦਾ ਦੌਰਾ ਕਰਕੇ ਕੋਵਿਡ-19 ਡਿਊਟੀ ’ਤੇ ਤਾਇਨਾਤ ਹੋਮ ਗਾਰਡ ਜੁਆਨਾਂ ਦੀ ਹੌਂਸਲਾ ਅਫ਼ਜ਼ਾਈ ਕੀਤੀ ਗਈ। ਉਨ੍ਹਾਂ ਇਸ ਮੌਕੇ ਜ਼ਿਲ੍ਹਾ ਸਿਵਲ ਹਸਪਤਾਲ ਨਵਾਂਸ਼ਹਿਰ ਦੇ ਆਈਸੋਲੇਸ਼ਨ ਵਾਰਡ ’ਚ ਤਾਇਨਾਤ ਹੋਮ ਗਾਰਡ ਜੁਆਨਾਂ ਦੀ ਡਿਊਟੀ ਦੀ ਪ੍ਰਸ਼ੰਸਾ ਕਰਦੇ ਹੋਏ, ਉਨ੍ਹਾਂ ਨੂੰ ਐਮ ਐਲ ਏ ਅੰਗਦ ਸਿੰਘ ਵੱਲੋਂ ਕੈਸ਼ ਐਵਾਰਡ ਦੀ ਵੰਡ ਵੀ ਕੀਤੀ। ਸਿਵਲ ਹਸਪਤਾਲ ਨਵਾਂਸ਼ਹਿਰ ਵਿਖੇ ਉਨ੍ਹਾਂ ਨੇ ਵਿਧਾਇਕ ਅੰਗਦ ਸਿੰਘ ਵੱਲੋਂ ਕੋਵਿਡ-19 ਦੌਰਾਨ ਡਿਊਟੀ ਕਰਨ ਵਾਲੇ ਸਿਹਤ ਕਰਮੀਆਂ ਅਤੇ ਹੋਮ ਗਾਰਡ ਜੁਆਨਾਂ ਦੀ ਹੌਂਸਲਾ ਅਫ਼ਜ਼ਾਈ ਲਈ ਧੰਨਵਾਦ ਵੀ ਕੀਤਾ।
ਉਨ੍ਹਾਂ ਇਸ ਮੌਕੇ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਵਿਨੈ ਬਬਲਾਨੀ ਅਤੇ ਐਸ ਐਸ ਪੀ ਅਲਕਾ ਮੀਨਾ ਪਾਸੋਂ ਜ਼ਿਲ੍ਹੇ ’ਚ ਕੋਵਿਡ-19 ਦੇ ਮਾਮਲਿਆਂ ਬਾਅਦ ਦੀ ਹਾਲਤ ਦਾ ਜਾਇਜ਼ਾ ਵੀ ਲਿਆ। ਵਰਨਣਯੋਗ ਹੈ ਕੁਲਤਾਰਨ ਸਿੰਘ ਘੁੰਮਣ ਕਮਾਂਡੈਂਟ ਜਰਨਲ ਪੰਜਾਬ ਹੋਮ ਗਾਰਡਜ਼ ਅਤੇ ਡਾਇਰੈਕਟਰ ਸਿਵਲ ਡਿਫ਼ੈਂਸ ਪੰਜਾਬ ਜੋ ਕਿ ਅੱਜ ਨਵਾਂਸ਼ਹਿਰ ਤੋਂ ਇਲਾਵਾ ਮੋਹਾਲੀ, ਰੂਪਨਗਰ, ਹੁਸ਼ਿਆਰਪੁਰ, ਜਲੰਧਰ ਤੇ ਕਪੂਰਥਲਾ ’ਚ ਕੋਵਿਡ-19 ਕਰਫ਼ਿਊ ਡਿਊਟੀ ਅਤੇ ਹੋਰ ਥਾਂਵਾਂ ’ਤੇ ਤਾਇਨਾਤ ਜੁਆਨਾਂ ਦੀਆਂ ਮੁਸ਼ਕਿਲਾਂ ਜਾਣਨ ਆਏ ਸਨ, ਨੇ ਪਿਛਲੇ ਦਿਨੀਂ ਨੂਰਮਹਿਲ ’ਚ ਡਿਊਟੀ ਦੌਰਾਨ ਸ਼ਰਾਰਤੀ ਅਨਸਰਾਂ ਵੱਲੋਂ ਸੁੱਟੇ ਪੈਟਰੋਲ ਬੰਬ ਨਾਲ ਝੁਲਸੇ ਹੋਮ ਗਾਰਡ ਜੁਆਨ ਰਛਪਾਲ ਸਿੰਘ ਦਾ ਉਸ ਦੇ ਪਿੰਡ ਫ਼ਰਵਾਲਾ (ਨੂਰਮਹਿਲ) ਪੁੱਜ ਕੇ ਹਾਲ ਵੀ ਜਾਣਿਆ ਅਤੇ ਉਸ ਵੱਲੋਂ ਦਿਖਾਈ ਬਹਾਦਰੀ ਦੀ ਸ਼ਲਾਘਾ ਵੀ ਕੀਤੀ। ਉਨ੍ਹਾਂ ਦੇ ਨਵਾਂਸ਼ਹਿਰ ਦੌਰੇ ਮੌਕੇ ਚਰਨਜੀਤ ਸਿੰਘ ਡਵੀਜ਼ਨਲ ਕਮਾਂਡੈਂਟ ਜਲੰਧਰ ਡਵੀਜ਼ਨ, ਸੋਹਣ ਸਿੰਘ ਮਿਸਰਾ ਜ਼ਿਲ੍ਹਾ ਕਮਾਂਡਰ ਜਲੰਧਰ, ਡਾ. ਅਜੇਪਾਲ ਸਿੰਘ ਜ਼ਿਲ੍ਹਾ ਕਮਾਂਡਰ ਰੂਪਨਗਰ, ਕੈਪਟਨ ਗਗਨਪ੍ਰੀਤ ਸਿੰਘ ਢਿੱਲੋਂ ਜ਼ਿਲ੍ਹਾ ਕਮਾਂਡਰ ਹੁਸ਼ਿਆਰਪੁਰ ਵੀ ਮੌਜੂਦ ਸਨ ।
