ਸਟੇਅ ਐਟ ਹੋਮ’ ਵਿਰੁੱਧ ਕਈ ਥਾਈਂ ਪ੍ਰਦਰਸ਼ਨ, ਭਾਰਤੀ ਜੋੜਾ ਮ੍ਰਿਤਕ ਮਿਲਿਆ
ਵਾਸ਼ਿੰਗਟਨ 1 ਮਈ (ਹੁਸਨ ਲੜੋਆ ਬੰਗਾ)– ਅਮਰੀਕਾ ਵਿਚ ਪਿਛਲੇ 24 ਘੰਟਿਆਂ ਦੌਰਾਨ ਕੋਰੋਨਾਵਾਇਰਸ ਨੇ 2502 ਹੋਰ ਜਾਨਾਂ ਲੈ ਲਈਆਂ ਹਨ ਤੇ ਮਰਨ ਵਾਲਿਆਂ ਦੀ ਗਿਣਤੀ 63861 ਹੋ ਗਈ ਹੈ ਜਦ ਕਿ ਪੀੜਤਾਂ ਦੀ ਗਿਣਤੀ 10,95,210 ਹੋ ਗਈ ਹੈ ਜਿਨਾਂ ਵਿਚੋਂ 8,75,612 ਸਰਗਰਮ ਮਾਮਲੇ ਹਨ। ਹੁਣ ਤੱਕ 63,91,887 ਅਮਰੀਕੀਆਂ ਦੇ ਟੈਸਟ ਹੋਏ ਹਨ। 2,19,598 ਮਾਮਲੇ ਬੰਦ ਕਰ ਦਿੱਤੇ ਗਏ ਹਨ ਜਿਨਾਂ ਵਿਚੋਂ 29 % ਮੌਤਾਂ ਹੋਈਆਂ ਹਨ ਤੇ 71% ਅਮਰੀਕੀ ਠੀਕ ਹੋ ਕੇ ਹਸਪਤਾਲਾਂ ਵਿਚੋਂ ਜਾ ਚੁੱਕੇ ਹਨ। ਇਸ ਦੌਰਾਨ ਘਰਾਂ ਵਿਚ ਰਹਿਕੇ ਤੰਗ ਆ ਚੁੱਕੇ ਲੋਕਾਂ ਵੱਲੋਂ ਮਿਸ਼ੀਗਨ ਸਮੇਤ ਹੋਰ ਰਾਜਾਂ ਵਿਚ ਪ੍ਰਦਰਸ਼ਨ ਕਰਨ ਦੀਆਂ ਵੀ ਰਿਪੋਰਟਾਂ ਹਨ।
ਮਿਸ਼ੀਗਨ ਵਿਚ ਹੰਗਾਮੀ ਸਥਿੱਤੀ ਵਿਰੁੱਧ ਪ੍ਰਦਰਸ਼ਨ ਮਿਸ਼ੀਗਨ ਦੀ ਰਾਜਧਾਨੀ ਲਾਂਸਿੰਗ ਵਿਚ ਲੋਕਾਂ ਦੇ ਇਕ ਵੱਡੇ ਸਮੂੰਹ ਨੇ ਕੋਰੋਨਾਵਾਇਰਸ ਕਾਰਨ ਰਾਜ ਵਿਚ ਐਲਾਨੀ ਹੰਗਾਮੀ ਸਥਿੱਤੀ ਦੇ ਹੁਕਮਾਂ ਨੂੰ ਵਾਪਿਸ ਲੈਣ ਦੀ ਮੰਗ ਨੂੰ ਲੈ ਕੇ ਪ੍ਰਦਰਸ਼ਨ ਕੀਤਾ। ਪ੍ਰਦਰਸ਼ਨਕਾਰੀ ਸਟੇਟ ਹਾਊਸ ਚੈਂਬਰ ਦੇ ਬਾਹਰਵਾਰ ਲੌਬੀ ਵਿਚ ਇਕੱਠੇ ਹੋਏ। ਉਹ ਵਿਧਾਨ ਸਭਾ ਸਦਨ ਵਿਚ ਜਾਣਾ ਚਹੁੰਦੇ ਸਨ। ਉਨ•ਾਂ ਵਿਚੋਂ ਬਹੁਤ ਸਾਰਿਆਂ ਨੇ ਮਾਸਕ ਨਹੀਂ ਪਾਏ ਹੋਏ ਸਨ ਤੇ ਕਈਆਂ ਨੇ ਮੋਢਿਆਂ ਉਪਰ ਰਾਈਫ਼ਲਾਂ ਪਾਈਆਂ ਹੋਈਆਂ ਸਨ। ਮਾਸਕ ਪਹਿਨੀ ਮਿਸ਼ੀਗਨ ਪੁਲਿਸ ਦੇ ਜਵਾਨਾਂ ਨੇ ਪ੍ਰਦਰਸ਼ਕਾਰੀਆਂ ਨੂੰ ਸਦਨ ਦੇ ਪ੍ਰਵੇਸ਼ ਦਰਵਾਜ਼ੇ ਅੱਗੇ ਰੋਕ ਲਿਆ ਤੇ ਅੱਗੇ ਨਹੀਂ ਵਧਣ ਦਿੱਤਾ। ਕੁੱਝ ਪ੍ਰਦਰਸ਼ਨਕਾਰੀ ਜਿਨ•ਾਂ ਕੋਲ ਹਥਿਆਰ ਸਨ, ਨੇ ਜਨਤਿਕ ਗੈਲਰੀ ਵਿਚ ਨਾਅਰੇਬਾਜੀ ਕੀਤੀ।
ਸਾਰੀ ਜਿੰਦਗੀ ਦੀ ਕਮਾਈ ਮੁਲਾਜ਼ਮਾਂ ਵਿਚ ਵੰਡੀ :
ਕੋਰੋਨਾਵਾਇਰਸ ਦੀ ਮਹਾਮਾਰੀ ਦੌਰਾਨ ਬਹੁਤ ਸਾਰੇ ਦਿੱਲ ਦਰਿਆ ਲੋਕ ਸਾਹਮਣੇ ਆ ਰਹੇ ਹਨ ਜੋ ਆਪਣੇ ਮੁਲਾਜ਼ਮਾਂ ਤੇ ਲੋੜਵੰਦਾਂ ਦੀ ਬਾਂਹ ਫੜ ਰਹੇ ਹਨ। ਇਨਾਂ ਵਿਚੋਂ ਇਕ ਨਾਂ ਰਿਚ ਗਾਇ ਦਾ ਹੈ ਜਿਸ ਨੇ ਸਟਾਕ ਮਾਰਕਿਟ ਵਿਚੋਂ 16 ਲੱਖ ਡਾਲਰ ਕਮਾਏ ਤੇ ਉਹ ਸਾਰੇ ਆਪਣੇ ਮੁਲਾਜ਼ਮਾਂ ਵਿਚ ਵੰਡ ਦਿੱਤੇ। ਇਕ ਅਮਰੀਕੀ 20 ਸਾਲਾਂ ਵਿਚ ਔਸਤਨ ਏਨੇ ਪੈਸੇ ਕਮਾਉਂਦਾ ਹੈ। ਰਿਚ ਗਾਇ ਜਿਸ ਨੂੰ ਕੋਨਰ ਗੁਰੱਪ ਦੇ ਸੰਸਥਾਪਕ ਤੇ ਸੀ ਈ ਓ ਲੈਰੀ ਕੋਨਰ ਵਜੋਂ ਵੀ ਜਾਣਿਆਂ ਜਾਂਦਾ ਹੈ, ਨੇ ਸੱਦੀ ਸਟਾਫ਼ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਕਿਹਾ ‘ ਆਓ ਆਪਾਂ ਇਸ ਸੰਕਟ ਦੀ ਘੜੀ ਵਿਚ ਮਿਆਰੀ ਕਦਰਾਂ ਕੀਮਤਾਂ ਦੀ ਗੱਲ ਕਰੀਏ। ਮੈ ਸਟਾਕ ਮਾਰਕੀਟ ਦੀ ਸਾਰੀ ਕਮਾਈ 16 ਲੱਖ ਡਾਲਰ ਤੁਹਾਡੇ ਵਿਚ ਵੰਡਣ ਦਾ ਐਲਾਨ ਕਰਦਾ ਹਾਂ।” ਇਹ ਅਲਾਨ ਸੁਣਕੇ ਕਈ ਮੁਲਾਜ਼ਮਾਂ ਦੇ ਅੱਥਰੂ ਆ ਗਏ ਤੇ ਕਈਆਂ ਦੇ ਚੇਹਰੇ ਖਿੜ ਗਏ।
ਇਕ ਭਾਰਤੀ ਜੋੜਾ ਘਰ ਵਿਚ ਮ੍ਰਿਤਕ ਮਿਲਿਆ :
ਜਰਸੀ ਸ਼ਹਿਰ, ਨਿਊ ਜਰਸੀ ਵਿਚ ਰਹਿੰਦਾ ਇਕ ਭਾਰਤੀ ਜੋੜਾ ਘਰ ਵਿਚ ਮ੍ਰਿਤਕ ਮਿਲਿਆ। ਮ੍ਰਿਤਕ ਜੋੜੇ ਦੀ ਪਛਾਣ ਮਨਮੋਹਨ ਮਲ ਤੇ ਉਸ ਦੀ ਪਤਨੀ ਗਰੀਮਾ ਕੋਠਾਰੀ ਵਜੋਂ ਹੋਈ ਹੈ। ਇਹ ਜੋੜਾ ਨੁਕੜ ਰੈਸਟੋਰੈਂਟ ਦਾ ਮਾਲਕ ਸੀ। 35 ਸਾਲਾ ਕੋਠਾਰੀ ਗਰਭਵਤੀ ਸੀ। ਕੋਠਾਰੀ ਦੇ ਸਰੀਰ ਦੇ ਉਪਰਲੇ ਹਿੱਸੇ ‘ਤੇ ਜ਼ਖਮ ਵੀ ਮਿਲੇ ਹਨ। ਕੋਠਾਰੀ ਦੀ ਲਾਸ਼ ਮਿਲਣ ਦੇ ਕੁਝ ਮਿੰਟਾਂ ਬਾਅਦ ਥੋੜੀ ਦੂਰ ਤੋਂ ਮਨਮੋਹਨ ਮਲ ਦੀ ਲਾਸ਼ ਵੀ ਬਰਾਮਦ ਹੋਈ। ਪੁਲਿਸ ਮਾਮਲੇ ਦੀ ਖੁਦਕੁੱਸ਼ੀ/ ਹੱਤਿਆ ਦੋਨਾਂ ਪੱਖਾਂ ਤੋਂ ਜਾਂਚ ਕਰ ਰਹੀ ਹੈ।
