ਨਵਾਂਸ਼ਹਿਰ (ਏ-ਆਰ. ਆਰ. ਐੱਸ. ਸੰਧੂ) ਜ਼ਿਲ੍ਹਾ ਮੈਜਿਸਟ੍ਰੇਟ ਸ਼ਹੀਦ ਭਗਤ ਸਿੰਘ ਨਗਰ ਵਿਨੈ ਬਬਲਾਨੀ ਨੇ ਪੰਜਾਬ ਸਰਕਾਰ ਦੀਆਂ ਕੋਰੋਨਾ ਵਾਇਰਸ ਰੋਕਥਾਮ ਦੇ ਮੱਦੇਨਜ਼ਰ ਰਾਜ ਦੀਆਂ ਮੁੱਖ ਸੜ੍ਹਕਾਂ ਜਿਵੇਂ ਕਿ ਰਾਸ਼ਟਰੀ ਮਾਰਗ/ਰਾਜ ਮਾਰਗ/ਜ਼ਿਲ੍ਹੇ ਦੀਆਂ ਮੁੱਖ ਸੜ੍ਹਕਾਂ ਰਾਹੀਂ ਹੀ ਜ਼ਿਲ੍ਹਿਆਂ ’ਚ ਐਂਟਰੀ ਹੋਣ ਦੇਣ ਦੀਆਂ ਹਦਾਇਤਾਂ ਦੇ ਮੱਦੇਨਜ਼ਰ ਸ਼ਹੀਦ ਭਗਤ ਸਿੰਘ ਨਗਰ ਜ਼ਿਲ੍ਹੇ ’ਚ ਦਾਖਲ ਹੋਣ ਲਈ 14 ਐਂਟਰੀ ਨਾਕੇ ਨਿਰਧਾਰਿਤ ਕੀਤੇ ਹਨ।
ਇਨ੍ਹਾਂ ਨਾਕਿਆਂ ਤੋਂ ਬਿਨਾਂ ਜ਼ਿਲ੍ਹੇ ਨੂੰ ਲਗਦੇ ਹੋਰ ਸਾਰੇ ਰਸਤੇ ਸੀਲ ਕਰ ਦਿੱਤੇ ਜਾਣਗੇ। ਇਨ੍ਹਾਂ ਐਂਟਰੀ ਨਾਕਿਆਂ ’ਤੇ ਪੁਲਿਸ ਦੇ ਨਾਲ 24 ਘੰਟੇ ਮੈਡੀਕਲ ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ, ਜੋ ਕਿ ਵਿਅਕਤੀ ਦੀ ਉੱਥੇ ਰੱਖੇ ਰਜਿਸਟਰਾਂ ’ਚ ਐਂਟਰੀ ਕਰਵਾਉਣ ਅਤੇ ਸਿਹਤ ਜਾਂਚ ਬਾਅਦ ਹੀ ਅੱਗੇ ਜਾਣ ਦੇਣਗੀਆਂ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਨਾਕਿਆਂ ’ਚ ਤਹਿਸੀਲ ਨਵਾਂਸ਼ਹਿਰ ’ਚ ਫ਼ਿਲੌਰ ਨਵਾਂਸ਼ਹਿਰ ਰੋਡ ’ਤੇ ਚੱਕਦਾਨਾ, ਮੱਤੇਵਾਵਾਂ ਪੁੱਲ, ਮਾਛੀਵਾੜਾ-ਰਾਹੋਂ ਪੁੱਲ ’ਤੇ ਕਨੌਣ, ਗੜ੍ਹਸ਼ੰਕਰ-ਹੁਸ਼ਿਆਰਪੁਰ ਰੋਡ ’ਤੇ ਅਲਾਚੌਰ, ਤਹਿਸੀਲ ਬੰਗਾ ’ਚ ਬੇਈਂ ਪੁੱਲ ’ਤੇ ਕਟਾਰੀਆਂ, ਫ਼ਗਵਾੜਾਂ-ਬੰਗਾ ਰੋਡ ’ਤੇ ਮੇਹਲੀ, ਗੜ੍ਹਸ਼ੰਕਰ-ਬੰਗਾ ਰੋਡ ’ਤੇ ਕੋਟ ਪੱਤੀ, ਬੱਸ ਅੱਡਾ ਚਾਹਲ ਕਲਾਂ, ਤਹਿਸੀਲ ਬਲਾਚੌਰ ’ਚ ਬਲਾਚੌਰ-ਰੋਪੜ ਰੋਡ ’ਤੇ ਆਸਰੋਂ, ਗੜ੍ਹਸ਼ੰਕਰ-ਬਲਾਚੌਰ ਰੋਡ ’ਤੇ ਬਕਾਪੁਰ, ਸ੍ਰੀ ਆਨੰਦਪੁਰ ਸਾਹਿਬ-ਪੋਜੇਵਾਲ ਰੋਡ ’ਤੇ ਸਿੰਘਪੁਰ, ਨਵਾਂਗਰਾਂ, ਨੈਣਵਾਂ ਰੋਡ ’ਤੇ ਟਰੋਵਾਲ ਅਤੇ ਭੱਦੀ ਅੱਡੇ ’ਤੇ ਭੱਦੀ ਸ਼ਾਮਿਲ ਹਨ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਨਾਕਿਆਂ ਤੋਂ ਇਲਾਵਾ ਜ਼ਿਲ੍ਹੇ ਨੂੰ ਲੱਗਦੇ ਹੋਰ ਸਾਰੇ ਰਸਤੇ ਤੇ ਲਿੰਕ ਸੜ੍ਹਕਾਂ ਸੀਲ ਕਰ ਦਿੱਤੀਆਂ ਜਾਣਗੀਆਂ।
