ਰਾਸ਼ਟਰਪਤੀ ਟਰੰਪ ਵੱਲੋਂ ਓਪਨ ਅਪ ਅਮੈਰੀਕਾ ਅਗੇਨ ਯੋਜਨਾ ਜਾਰੀ  

ਅਮਰੀਕਾ ਵਿਚ ਨਹੀਂ ਥਮ ਰਿਹਾ ਕੋਰੋਨਾਵਾਇਰਸ ਦਾ ਪ੍ਰਕੋਪ, 34000 ਤੋਂ ਵਧ ਮੌਤਾਂ

ਪੀੜਤਾਂ ਦੀ ਗਿਣਤੀ 678,144 ਹੋਈ।

ਵਾਸ਼ਿੰਗਟਨ 17 ਅਪ੍ਰੈਲ (ਹੁਸਨ ਲੜੋਆ ਬੰਗਾ)-ਕੋਰੋਨਾਵਾਇਰਸ ਨਾਲ ਰੋਜਾਨਾ 2000 ਤੋਂ ਵਧ ਹੋ ਰਹੀਆਂ ਮੌਤਾਂ ਦਰਮਿਆਨ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਓਪਨ ਅਪ ਅਮੈਰੀਕਾ ਅਗੇਨ ਯੋਜਨਾ ਜਾਰੀ ਕਰ ਦਿੱਤੀ ਹੈ ਜਿਸ ਤਹਿਤ ਰਾਜਾਂ ਨੂੰ ਪੜਾਅਵਾਰ ਅਰਥ ਵਿਵਸਥਾ ਖੋਲਣ ਲਈ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਗਏ ਹਨ।   ਕੋਰੋਨਾਵਾਇਰਸ ਕਾਰਨ ਵੱਡੀ ਪੱਧਰ ਉਪਰ ਅਰਥਵਿਵਸਥਾ ਬੰਦ ਕਰ ਦਿੱਤੀ ਗਈ ਸੀ। ਵਾਈਟ ਹਾਊਸ ਵਿਖੇ ਐਲਾਨੀ ਇਸ ਤਿੰਨ ਪੜਾਵੀ ਯੋਜਨਾ ਤਹਿਤ ਰਾਜਾਂ ਦੇ ਗਵਰਨਰਾਂ ਨੂੰ ਇਹ ਅਧਿਕਾਰ ਦਿੱਤਾ ਗਿਆ ਹੈ ਕਿ ਉਹ ਇਸ ਯੋਜਨਾ ਉਪਰ ਅਮਲ ਕਰਨ ਸਬੰਧੀ ਆਪਣੇ ਤੌਰ ‘ਤੇ ਨਿਰਨਾ ਲੈਣ। 4 ਹਫਤੇ ਪਹਿਲਾਂ  ਕੋਰੋਨਾਵਇਰਸ ਫੈਲਣ ਉਪਰੰਤ 16 ਕਰੋੜ 80 ਲੱਖ ਅਮਰੀਕੀਆਂ ਨੇ ਬੇਰੁਜ਼ਗਾਰੀ ਭੱਤੇ ਲਈ ਦਰਖਾਸਤਾਂ ਦਿੱਤੀਆਂ ਸਨ। ਇਸ ਤੋਂ ਇਲਾਵਾ ਪਿਛਲੇ ਇਕ ਹਫਤੇ ਵਿਚ 5 ਕਰੋੜ 20 ਲੱਖ ਅਮਰੀਕੀਆਂ ਨੇ ਬੇਰੁਜ਼ਗਾਰੀ ਭੱਤੇ ਉਪਰ ਦਾਅਵਾ ਕੀਤਾ ਹੈ। ਇਸ ਲਈ ਸੰਘੀ ਸਰਕਾਰ ਚਹੁੰਦੀ ਹੈ ਕਿ ਜਿੰਨੀ
ਛੇਤੀ ਸੰਭਵ ਹੋ ਸਕੇ ਅਰਥ ਵਿਵਸਥਾ ਖੋਲ ਦਿੱਤੀ ਜਾਵੇ।

ਅਮਰੀਕਾ ਵਿਚ ਨਹੀਂ ਥਮ ਰਿਹਾ ਕੋਰੋਨਾਵਾਇਰਸ ਦਾ ਪ੍ਰਕੋਪ : ਦੇਸ਼ ਵਿਚ ਕੋਰੋਨਾਵਾਇਰਸ ਦਾ ਪ੍ਰਕੋਪ ਥਮਣ ਦਾ ਨਾਂ ਨਹੀਂ ਲੈ ਰਿਹਾ ਤੇ ਮੌਤਾਂ ਦੀ ਗਿਣਤੀ 34641 ਹੋ ਗਈ ਹੈ। ਜੌਹਨਜ ਹੋਪਕਿਨਜ਼ ਯੁਨੀਵਰਸਿਟੀ ਅਨੁਸਾਰ ਕੁਲ ਮਾਮਲੇ 6,78,144 ਹਨ ਜਿਨਾਂ ਵਿਚ ਕ੍ਰਿਆਸ਼ੀਲ ਮਾਮਲੇ 585445 ਹਨ। 13369 ਮਰੀਜ਼ਾਂ ਦੀ ਹਾਲਤ ਨਾਜ਼ਕ ਬਣੀ ਹੋਈ ਹੈ। ਹਾਲਤ ਇਹ ਹੈ ਕਿ ਲਾਸ਼ਾਂ ਸੰਭਾਲਣ ਵਿਚ ਮੁਸ਼ਕਿਲ ਆ ਰਹੀ ਹੈ।

ਨਰਸਿੰਗ ਹੋਮ ਵਿਚੋਂ 18 ਲਾਸ਼ਾਂ ਬਰਾਮਦ: ਪੁਲਿਸ ਨੇ ਨਿਊਜਰਸੀ ਦੇ ਇਕ ਬਦਲਵੀਂ ਥਾਂ ‘ਤੇ ਬਣਾਏ ਨਰਸਿੰਗ ਹੋਮ ਵਿਚੋਂ 18 ਲਾਸ਼ਾਂ ਬਰਾਮਦ ਕੀਤੀਆਂ ਹਨ। ਗਵਰਨਰ ਫਿਲ ਮਰਫੀ ਵੱਲੋਂ ਨਿਰਦੇਸ਼ ਦੇਣ ਉਪਰੰਤ ਪੁਲਿਸ ਵੱਲੋਂ ਨਰਸਿੰਗ ਹੋਮ ਦੀ ਛਾਣਬੀਣ ਕੀਤੀ ਗਈ ਜਿਸ ਦੌਰਾਨ ਇਧਰ ਉਧਰ ਪਈਆਂ 18 ਲਾਸ਼ਾਂ ਮਿਲੀਆਂ। ਰਾਜ ਦੇ ਅਧਿਕਾਰੀਆਂ ਅਨੁਸਾਰ  ਦੋ ਇਮਾਰਤਾਂ ਵਿਚ ਬਣਾਏ ਇਸ ਨਰਸਿੰਗ ਹੋਮ ਵਿਚ ਮਾਰਚ ਦੇ ਅੰਤ ਤੱਕ 35 ਵਿਅਕਤੀਆਂ ਦੀ ਮੌਤ ਹੋ ਚੁੱਕੀ ਸੀ। ਇਨਾਂ ਵਿਚੋਂ 19 ਮੌਤਾਂ ਕੋਰੋਨਾਵਾਇਰਸ ਕਾਰਨ ਹੋਈਆਂ ਹਨ। ਇਸ ਨਰਸਿੰਗ ਹੋਮ ਵਿਚ 700 ਬੈੱਡ ਹਨ ਤੇ 500 ਤੋਂ ਵਧ  ਲੋਕ ਰਹਿੰਦੇ ਹਨ।

ਮੀਟ ਦੀ ਥੁੜ ਪੈਦਾ ਹੋਈ: ਗਾਹਕਾਂ ਨੂੰ ਅਮਰੀਕਾ ਦੇ ਗਰੋਸਰੀ ਸਟੋਰਾਂ ਵਿਚ ਮੀਟ ਨਹੀਂ ਮਿਲ ਰਹੀ। ਦੁੱਧ ਵਾਧੂ ਹੋ ਗਿਆ ਹੈ। ਇਹ ਕਿਹਾ ਜਾ ਸਕਦਾ
ਹੈ ਕਿ ਕੋਰੋਨਾਵਾਇਰਸ ਦੇ ਫੈਲਾਅ ਕਾਰਨ  ਦੇਸ਼ ਵਿਚ ਜਰੂਰੀ ਵਸਤਾਂ ਦੀ ਸਪਲਾਈ ਬੁਰੀ ਤਰਾਂ ਪ੍ਰਭਾਵਿਤ ਹੋ ਰਹੀ ਹੈ। ਲੰਘੇ  ਐਤਵਾਰ ਸਿਓਕਸ ਫਾਲਜ਼ ਦੱਖਣੀ ਡਕੋਤਾ ਵਿਚ ਸਥਿੱਤ ਇਕ ਵੱਡਾ ਮੀਟ ਪ੍ਰਾਸੈਸਿੰਗ ਪਲਾਂਟ ਬੰਦ ਕਰ ਦਿੱਤਾ  ਗਿਆ ਸੀ। ਇਹ ਪਲਾਂਟ ਕੁਝ ਮੁਲਾਜ਼ਮਾਂ ਨੂੰ ਕੋਰੋਨਾ ਹੋ ਜਾਣ ਕਾਰਨ ਬੰਦ ਕਰਨਾ ਪਿਆ ਸੀ। ਸਮਿਥਫੂਡ ਦੇ ਸੀ ਈ ਓ ਕੇਨਥ ਸੁਲੀਵਨ ਨੇ ਪਲਾਂਟ ਬੰਦ ਕਰਨ ਸਮੇਂ ਚਿਤਾਵਨੀ ਦਿੱਤੀ ਸੀ ਕਿ ਦੇਸ਼ ਵਿਚ ਸਪਲਾਈ ਚੇਨ ਟੁੱਟ ਸਕਦੀ ਹੈ।

ਤਿੰਨ ਭਾਰਤੀਆਂ ਦਾ ਪਲਾਜਮਾ ਤਹਿਤ ਇਲਾਜ: ਟੈਕਸਸ ਹਿਉਸਟਨ ਦੇ ਹਸਪਤਾਲ ਦੇ ਸੂਤਰਾਂ ਨੇ ਦੱਸਿਆ ਕਿ ਤਿੰਨ ਭਾਰਤੀ-ਅਮਰੀਕੀ, ਜਿਨ੍ਹਾਂ ਨੂੰ ਕੋਵਿਡ -19 ਲਈ
ਨਾਜ਼ੁਕ ਹਾਲਤ ਵਿੱਚ ਹਸਪਤਾਲ ਦਾਖਲ ਕਰਵਾਇਆ ਗਿਆ ਸੀ, ਬਰਾਮਦ ਹੋਏ ਕਰੋਨਾ ਦੇ ਮਰੀਜ਼ਾਂ ਤੋਂ ਪਲਾਜ਼ਮਾ ਨਾਲ ਟ੍ਰਾਂਸਫਰ ਹੋਣ ਤੋਂ ਬਾਅਦ ਉਨ੍ਹਾਂ ਦੇ ਠੀਕ ਹੋਣ ਦੇ ਸੰਕੇਤ ਦਿਖਾਈ ਦੇ ਰਹੇ ਹਨ। ਜਿਵੇਂ ਕਿ ਅਜੇ ਕੋਵਿਡ -19 ਲਈ ਟੀਕਾ ਮਹੀਨਿਆਂ ਤੋਂ ਜਾਰੀ ਰਹਿਣ ਦੀ ਉਮੀਦ ਨਹੀਂ ਹੈ ਅਤੇ ਰੋਜ਼ਾਨਾ ਨਵੇਂ ਕੇਸ ਵੱਧ ਰਹੇ ਹਨ, ਟੈਕਸਾਸ ਅਤੇ ਦੇਸ਼ ਭਰ ਵਿਚ ਡਾਕਟਰ ਇਕ ਪੁਰਾਣੀ ਤਕਨੀਕ ਦੇ ਅਧਾਰ ਤੇ ਇਕ ਨਵੇਂ ਇਲਾਜ ਦਾ ਪ੍ਰਯੋਗ ਕਰ ਰਹੇ ਹਨ। ਇਲਾਜ ਲਈ ਐਂਟੀਬਾਡੀ ਰਿਚ ਪਲਾਜ਼ਮਾ ਉਨ੍ਹਾਂ ਲੋਕਾਂ ਤੋਂ ਲਿਆ ਜਾਂਦਾ ਹੈ ਜਿਹੜੇ ਕੋਰੋਨਾਵਾਇਰਸ ਤੋਂ ਠੀਕ ਹੋ ਚੁੱਕੇ ਹਨ। ਉਨਾਂ ਲੋਕਾਂ ਵਿਚ ਵਾਇਰਸ ਕਾਰਨ ਐਂਟੀਬਾਡੀਜ਼ ਖੂਨ ਵਿਚਲੇ ਪ੍ਰੋਟੀਨ ਹੁੰਦੇ ਹਨ ਜੋ ਖ਼ਾਸ ਬੈਕਟੀਰੀਆ ਅਤੇ ਵਾਇਰਸਾਂ ਨਾਲ ਲੜਦੇ ਹਨ ਤੇ ਟੀਕੇ ਦੀ ਅਣਹੋਂਦ ਵਿਚ, ਡਾਕਟਰ ਅਤੇ ਵਿਗਿਆਨੀ ਪਲਾਜ਼ਮਾ ਨੂੰ ਠੀਕ ਮੰਨ ਰਹੇ ਹਨ ਕਿਉਂਕਿ ਉਹ ਇਸ ਨੂੰ ਘੱਟ ਜੋਖਮ ਮੰਨਦੇ ਹਨ । ਬਾਏਲਰ ਕਾਲਜ ਆਫ਼ ਮੈਡੀਸਨ ਦੇ ਸਹਿ ਪ੍ਰਧਾਨ ਅਤੇ ਅਕਾਦਮਿਕ ਮਾਮਲੇ ਦੇ ਸਹਿਯੋਗੀ ਡੀਨ ਡਾ: ਅਸ਼ੋਕ ਬਾਲਾਸੁਬਰਾਮਨੀਅਮ ਨੇ ਕਿਹਾ ਕਿ ਹਿਊਸਟਨ ਦੇ ਬਾਏਲਰ ਸੇਂਟ ਲੂਕ ਦੇ ਮੈਡੀਕਲ ਸੈਂਟਰ ਦੇ ਪੰਜ ਮਰੀਜ਼ਾਂ ਦਾ ਇਲਾਜ ਬੀਮਾਰ ਪਲਾਜ਼ਮਾ ਨਾਲ ਹੋਇਆ ਹੈ।