ਪਟਿਆਲਾ (ਅਰਵਿੰਦਰ ਸਿੰਘ) ਸਰਬੱਤ ਦਾ ਭਲਾ ਚੈਰੀਟੇਬਲ ਟਰੱਸਟ ਕੰਮਪਲੈਕਸ ਅਰਬਨ ਅਸਟੇਟ ਫ਼ੇਜ਼ 2 ਵਿਖੇ ਆਯੋਜਿਤ ਇੱਕ ਸਾਦਾ ਪਰ ਸਨੇਹ ਭਰਪੂਰ ਅਭਿਨੰਦਨ ਸਮਾਗਮ ਵਿੱਚ ਟਰੱਸਟ ਵੱਲੋਂ ਨੈਸ਼ਨਲ ਥੀਏਟਰ ਆਰਟਸ ਸੋਸਾਇਟੀ (ਨਟਾਸ) ਪਟਿਆਲਾ ਜੋ ਪਿਛਲੇ 6 ਦਹਾਕਿਆਂ ਤੋਂ ਪੰਜਾਬੀ ਭਾਸ਼ਾ, ਰੰਗ ਮੰਚ ਅਤੇ ਸਮਾਜ ਸੇਵਾ ਕਾਰਜਾਂ ਚ ਜੁਟੀ ਪ੍ਰਸਿੱਧ ਸੰਸਥਾ ਹੈ, ਨੂੰ ਸਨਮਾਨਿਤ ਕੀਤਾ ਗਿਆ। ਟਰੱਸਟ ਮੁਖੀਗਤ ਪ੍ਰਸਿੱਧ ਪਰ ਉਪਕਾਰੀ ਡਾ. ਐਸ.ਪੀ ਸਿੰਘ ਓਬਰਾਏ ਜੋ ਦੁਬਈ ਦੇ ਨਾਮਵਰ ਵਪਾਰੀ ਹਨ, ਨੇ ਨਟਾਸ ਦੇ ਨਿਰਦੇਸ਼ਕ ਸ਼੍ਰੀ ਪ੍ਰਾਣ ਸਭਰਵਾਲ ਨੂੰਨਟਾਸ ਦੇ ਸਨਮਾਨ ਵਜੋਂ 5100 ਰੁਪਏ ਦਾ ਕੈਸ਼ ਅਵਾਰਡ ਚੈੱਕ ਪ੍ਰਦਾਨ ਕੀਤਾ। ਇਸ ਅਵਸਰ ਤੇ ਉਨ੍ਹਾਂ ਨਾਲ ਟਰੱਸਟ ਦੇ ਰਾਸ਼ਟਰੀ ਪ੍ਰਧਾਨ ਸ੍ਰ. ਜੱਸਾ ਸਿੰਘ ਸੰਧੂ ਅਤੇ ਸਿਹਤਸੇਵਾਵਾਂ ਡਾਇਰੈਕਟਰ ਡਾ. ਦਲਜੀਤ ਸਿੰਘ ਗਿੱਲ ਸੁਸ਼ੋਭਿਤ ਸਨ। ਨਟਾਸ ਨੂੰ ਇਹ ਸਨਮਾਨ ਨਟਾਸ ਵੱਲੋਂ ਆਰੰਭੀ ਮਾਤ ਭਾਸ਼ਾ ਪੰਜਾਬੀ ਥੀਏਟਰ ਵਿਕਾਸ ਮੁਹਿੰਮ ਜਿਸ ਦਾ ਪਿਛਲੇ ਦਿਨੀਂ ਉਦਘਾਟਨ, ਮੈਡਮ ਮਨਿੰਦਰ ਕੌਰ ਸੁਪਤਨੀ ਡਾ. ਐਸ.ਪੀ ਸਿੰਘ ਓਬਰਾਏ ਨੇ ਗਾਰਡਨ ਨਾਟਕ ਮੇਲੇ ਵਿੱਚ ਕੀਤਾ ਸੀ, ਦੇ ਸਫਲ ਸਮਾਪਨ ਨਮਿਤ ਕੀਤਾ ਗਿਆ। ਨਿਰਦੇਸ਼ਕ ਸ਼੍ਰੀ ਪ੍ਰਾਣ ਸਭਰਵਾਲ ਨੇਧੰਨਵਾਦ ਕਰਦਿਆਂ ਦੱਸਿਆ ਕਿ ਥੀਏਟਰ ਵਿਕਾਸ ਮੁਹਿੰਮ ਤਹਿਤ ਉਨ੍ਹਾਂ ਅਤੇ ਸੁਪਤਨੀ ਲੇਖਕ-ਕਲਾਕਾਰ ਸ਼੍ਰੀਮਤੀ ਸੁਨੀਤਾ ਸਭਰਵਾਲ ਵੱਲੋਂ ਨਿਰਦੇਸ਼ਤ 12 ਸਥਾਨਾਂ, ਜਿਵੇਂ ਗਾਰਡਨ ਥੀਏਟਰ ਕੰਪਲੈਕਸ, ਸਰਕਾਰੀ ਰਾਜ ਪੱਧਰੀ ਅੰਤਰਰਾਸ਼ਟਰੀ ਮਾਤਭਾਸ਼ਾ ਦਿਵਸ ਜਸ਼ਨ, ਕਰਾਫਟ ਮੇਲਾ ਸ਼ੀਸ਼ ਮਹਿਲ, ਢੁਡਿਆਲ ਖ਼ਾਲਸਾ ਸਕੂਲ, ਵੀਰ ਹਕੀਕਤ ਰਾਏ ਸਕੂਲ, ਸਰਕਾਰੀ ਹਾਈ ਅਤੇ ਸਰਕਾਰੀ ਐਲੀਮੈਂਟਰੀ ਸਕੂਲ ਥੇੜ੍ਹੀ, ਤੋਂ ਬਿਨਾ ਫ਼ਤਿਹਗੜ੍ਹ ਸਾਹਿਬ ਦੇ 6 ਪਿੰਡਾਂ, ਪੰਜ ਕੋਹਾਂ, ਜੀਵਨ ਸਿੰਘਵਾਲਾ, ਉੱਚਾ ਜਟਾਨਾ, ਰਾਏਪੁਰ ਰਾਈਆਂ, ਮੁੱਲੇਪੁਰ ਅਤੇ ਕੋਟਲਾ ਆਦਿ ਵਿੱਚ ਚੇਤਨਾ ਨਾਟਕ ਮੇਲੇ ਸਫਲਤਾ ਪੂਰਵਕ ਆਯੋਜਿਤ ਕੀਤੇ ਗਏ ਹਨ। ਨਟਾਸ ਪ੍ਰਧਾਨ ਸ੍ਰ. ਗੁਰਬਚਨ ਸਿੰਘ ਕੱਕੜ ਨੇ ਸਮੁੱਚੇ ਮੈਂਬਰਾਂ ਅਤੇ ਕਲਾਕਾਰਾਂ ਵੱਲੋਂ ਡਾ. ਓਬਰਾਏ, ਸੁਪਤਨੀ ਮੈਡਮ ਮਨਿੰਦਰ ਕੌਰ ਓਬਰਾਏ ਅਤੇ ਟਰੱਸਟ ਵੱਲੋਂ ਮਿਲ਼ੇ ਸਨਮਾਨ ਅਤੇ ਸਨੇਹ ਲਈ ਧੰਨਵਾਦ ਕਰਦਿਆਂ ਟਰੱਸਟ ਵੱਲੋਂਚਲਾਏ ਜਾ ਰਹੇ ਵਿਸ਼ਵ ਵਿਆਪੀ ਮਾਨਵ-ਸੇਵਾ ਪ੍ਰੋਜੈਕਟਾਂ ਦੀ ਸਫਲਤਾ ਤੇ ਵਧਾਈ ਦਿੱਤੀ ਅਤੇ ਸ਼ੁੱਭ ਕਾਮਨਾਵਾਂ ਭੇਂਟ ਕੀਤੀਆਂ।
