ਅਮਰੀਕਾ ਦੇ 16 ਰਾਜਾਂ ਦੇ 25 ਸ਼ਹਿਰਾਂ ਵਿਚ ਲਾਇਆ ਕਰਫ਼ਿਊ
ਰਾਸ਼ਟਰਪਤੀ ਨੇ ਪ੍ਰਦਰਸ਼ਨਕਾਰੀਆਂ ਨੂੰ ਦਿੱਤੀ ਸਖਤ ਚਿਤਾਵਨੀ
ਵਾਈਟ ਹਾਊਸ ਦੇ ਬਾਹਰ ਪ੍ਰਦਰਸ਼ਕਾਰੀਆਂ ਤੇ ਪੁਲਿਸ ਵਿਚਾਲੇ ਝੜਪਾਂ
ਵਾਸ਼ਿੰਗਟਨ (ਹੁਸਨ ਲੜੋਆ ਬੰਗਾ)— ਮਿਨੀਐਪੋਲਿਸ ਪੁਲਿਸ ਦੀ ਹਿਰਾਸਤ ਵਿਚ 4 ਦਿਨ ਪਹਿਲਾਂ ਇਕ ਕਾਲੇ ਵਿਅਕਤੀ ਦੀ ਹੋਈ ਮੌਤ ਨੂੰ ਲੈ ਕੇ ਸ਼ੁਰੂ ਹੋਏ ਪ੍ਰਦਰਸ਼ਨ ਪੂਰੇ ਅਮਰੀਕਾ ਵਿਚ ਫੈਲ ਗਏ ਹਨ। ਪ੍ਰਦਰਸ਼ਕਾਰੀਆਂ ਦੀ ਹਿੰਸਾ ਕਾਰਨ 16 ਰਾਜਾਂ ਦੇ 25 ਸ਼ਹਿਰਾਂ ਵਿਚ ਕਰਫ਼ਿਊ ਲਾਉਣਾ ਪਿਆ ਹੈ। ਜਿਨਾਂ ਸ਼ਹਿਰਾਂ ਵਿਚ ਕਰਫ਼ਿਊ ਲਾਇਆ ਗਿਆ ਹੈ ਉਨਾਂ ਵਿਚ ਬਾਵਰਲੀ ਹਿਲਜ਼ ਤੇ ਲਾਸ ਏਂਜਲਸ (ਕੈਲੀਫੋਰਨੀਆ), ਡੈਨਵਰ (ਕੋਲੋਰਾਡੋ), ਮਿਆਮੀ (ਫਲੋਰੀਡਾ), ਜਾਰਜੀਆ (ਐਟਲਾਂਟਾ), ਸ਼ਿਕਾਗੋ (ਇਲੀਨੋਇਸ), ਮਿਨੀਐਪੋਲਿਸ ਤੇ ਸੇਂਟ ਪਾਲ (ਮਿਨੀਸੋਟਾ), ਰੋਚੈਸਟਰ (ਨਿਊਯਾਰਕ), ਸਿਆਟਲ (ਵਾਸ਼ਿੰਗਟਨ) ਤੇ ਓਹੀਓ ਰਾਜ ਦੇ 5 ਸ਼ਹਿਰ ਵੀ ਸ਼ਾਮਿਲ ਹਨ।
ਵਾਈਟ ਹਾਊਸ ਦੇ ਬਾਹਰ ਝੜਪਾਂ-
ਵਾਈਟ ਹਾਊਸ ਦੇ ਬਾਹਰ ਤੇ ਰਾਜਧਾਨੀ ਦੇ ਹੋਰ ਖੇਤਰਾਂ ਵਿਚ ਪੁਲਿਸ ਤੇ ਪ੍ਰਦਰਸ਼ਨਕਾਰੀਆਂ ਵਿਚਾਲੇ ਝੜਪਾਂ ਹੋਈਆਂ ਜਿਸ ਉਪਰੰਤ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ‘ਭੀੜ ਹਿੰਸਾ’ ਵਿਰੁੱਧ ਸਖਤ ਚਿਤਾਵਨੀ ਦਿੱਤੀ ਤੇ ਕਿਹਾ ਕਿ ਇਸ ਨੂੰ ਸਖਤੀ ਨਾਲ ਦਬਾਅ ਦਿੱਤਾ ਜਾਵੇਗਾ। ਪ੍ਰਦਰਸ਼ਨਕਾਰੀਆਂ ਨੇ ‘ਕੈਪੀਟਲ ਬੈਲਟਵੇਅ’ ਉਪਰ ਵੀ ਜਾਮ ਲਾਇਆ। ਜਦੋਂ ਸੁਰੱਖਿਆ ਗਾਰਡ ਰਾਸ਼ਟਰਪਤੀ ਨੂੰ ਵਾਪਿਸ ਵਾਈਟ ਹਾਊਸ ਵੱਲ ਲਿਜਾ ਰਹੇ ਸਨ ਤਾਂ ਪ੍ਰਦਰਸ਼ਨਕਾਰੀਆਂ ਨੇ ਉਨਾਂ ਉਪਰ ਤੰਨਜ ਕੱਸੇ ਤੇ ਇਤਰਾਜ਼ਯੋਗ ਸ਼ਬਦਾਵਲੀ ਦੀ ਵਰਤੋਂ ਕੀਤੀ।
ਖੁਫ਼ੀਆ ਸੇਵਾ ਦੇ ਏਜੰਟਾਂ ਤੇ ਪੁਲਿਸ ਉਪਰ ਬੋਤਲਾਂ ਵੀ ਸੁੱਟੀਆਂ ਜਦ ਕਿ ਜਵਾਬੀ ਕਾਰਵਾਈ ਵਿਚ ਪੁਲਿਸ ਨੇ ਅਥਰੂ ਗੈਸ ਦੇ ਗੋਲੇ ਛੱਡੇ। ਪੂਰੀ ਰਾਜਧਾਨੀ ਵਿਚ ਹੋਏ ਜਿਆਦਾਤਰ ਪ੍ਰਦਰਸ਼ਨ ਸ਼ਾਤਮਈ ਰਹੇ। ਵਾਈਟ ਹਾਊਸ ਦੇ ਬਾਹਰ ਹੋਏ ਪ੍ਰਦਰਸ਼ਨ ਵਿਚ ਭਾਰਤੀ ਮੂਲ ਦੀ ਸੈਨੇਟਰ ਕਮਲਾ ਹੈਰਿਸ ਵੀ ਸ਼ਾਮਿਲ ਹੋਈ ਜਿਸ ਨੇ ਰਾਸ਼ਟਰਪਤੀ ਦੇ ਅਹੁੱਦੇ ਲਈ ਨਾਮਜ਼ਦਗੀ ਚੋਣ ਲੜੀ ਸੀ ਪਰ ਕਾਫੀ ਪੱਛੜ ਗਈ ਸੀ।
10000 ਹੋਰ ਜਵਾਨ ਤਾਇਨਾਤ-
ਮਿਨੀਐਪੋਲਿਸ ਵਿਚ ਹਿੰਸਾ ਰੁਕਣ ਦਾ ਨਾਂ ਨਹੀਂ ਲੈ ਰਹੀ। ਗਵਰਨਰ ਟਿਮ ਵਾਲਜ ਨੇ ਪ੍ਰੈਸ ਕਾਨਫੰਰਸ ਦੌਰਾਨ ਕਿਹਾ ਕਿ ਸ਼ਹਿਰ ਵਿਚ ਸਥਿੱਤੀ ਠੀਕ ਨਹੀਂ ਹੈ। ਇਹ ਆਮ ਲੋਕਾਂ ਉਪਰ ਹਮਲਾ ਹੈ। ਪ੍ਰਦਰਸ਼ਕਾਰੀ ਖੌਫ਼ ਪੈਦਾ ਕਰ ਰਹੇ ਹਨ ਤੇ ਸਾਡੇ ਮਹਾਨ ਸ਼ਹਿਰਾਂ ਨੂੰ ਅਸ਼ਾਂਤ ਕਰ ਰਹੇ ਹਨ। ਜੁੜਵੇਂ ਸ਼ਹਿਰ ਦੇ ਮੇਅਰ ਜੈਕੋਬ ਫਰੇਅ ਨੇ ਗਵਰਨਰ ਦੇ ਉਸ ਦਾਅਵੇ ‘ਤੇ ਸਹਿਮਤੀ ਪ੍ਰਗਟਾਈ ਹੈ ਜਿਸ ਵਿਚ ਉਨਾਂ ਕਿਹਾ ਸੀ ਕਿ ਜਿਆਦਾਤਰ ਪ੍ਰਦਰਸ਼ਨਕਾਰੀ ਮਿਨੀਸੋਟਾ ਤੋਂ ਬਾਹਰਲੇ ਹਨ। ਗਵਰਨਰ ਤੇ ਮੇਅਰ ਨੇ ਕਰਫ਼ਿਊ ਸਖਤੀ ਨਾਲ ਲਾਗੂ ਕਰਨ, ਪ੍ਰਮੁੱਖ ਰਾਸ਼ਟਰੀ ਮਾਰਗ ਬੰਦ ਕਰਨ ਤੇ ਪ੍ਰਦਰਸ਼ਨਕਾਰੀਆਂ ਨੂੰ ਗ੍ਰਿਫ਼ਤਾਰ ਕਰਨ ਦੀ ਚਿਤਾਵਨੀ ਦਿੱਤੀ ਹੈ। ਵਾਲਜ਼ ਨੇ ਲੋਕਾਂ ਨੂੰ ਕਿਹਾ ਕਿ ਉਹ ਘਰਾਂ ਤੋਂ ਬਾਹਰ ਨਾ ਨਿਕਲਣ ਤੇ ਹਾਲਾਤ ਵਿਗੜਣ ਨਾ ਦੇਣ। ਉਨਾਂ ਕਿਹਾ ਕਿ ਕਰਫ਼ਿਊ ਦੌਰਾਨ ਸ਼ਾਤਮਈ ਪ੍ਰਦਰਸ਼ਨਾਂ ਦੀ ਵੀ ਇਜਾਜ਼ਤ ਨਹੀਂ ਹੋਵੇਗੀ। ਹਿੰਸਾ ਨੂੰ ਵੇਖਦਿਆਂ ਹੋਇਆਂ ਮਿਨੀਸੋਟਾ ਵਿਚ 10000 ਹੋਰ ਸੁਰੱਖਿਆ ਜਵਾਨ ਤਾਇਨਾਤ ਕੀਤੇ ਗਏ ਹਨ।
